Hniarlawn pathawng Uk Ling Thang nih ‘World Champion’ he Zatlang Paih he a lak

Nizaan ah, US ram Indianapolis khuapi ah tuahmi ram tampi Laipaih World Champion i cuhnak ah Hniarlawn paṭhawng bik Uk Ling Thang nih zuamcawh World Champion he Zatlang Paih champion he a lak.

Zuamcawh World Champion ah Hniarlawn khua a si vemi Thawng Lian he bual an i cuh. Uk Ling Thang nih a pehpeh in voi 2 bak ‘pung’ ‘thlok’ a tengh i Leicung Laipaih Paṭhawngbik taisawm le dollar $7,000 pi cu a co colh.

Hniarlawn cu Chin khualipi Hakha, Malaysia, Australia, America le vawlei cung an phanhnak ram paoh ah paih thiam le paṭhawng bik lakah an i tel zungzal.

Uk Ling Thang hrim hi cu liamcia kum tlawmpal in Chin vawlei hnintu a rak si zungzal cang.

Nizaan ah tuahmi Paih Zuamnak cu NAPC nih Chin Miphun Ni Lawmhnak caah a tuahmi a si. US lawng si loin, ramdang um Lai patthawng pawl zong a sawm hna. NAPC hi US Chin Miphun Ni paih zuamnak a tuah lengmangtu a si.

2018 ah WPC nih tuahmi Heavyweight Champion zong a rak ngah. Nizaan zong mi tampi nih an zumh cia bang champion 2 bak a lak taktak hoi.

Uk Ling Thang le Thawng Lian

Champion 2; Zatlang Paih le Zuamcawh World Champion in laksawng a ngahmi hi $9,000 a si. A zohtu pawl nih an uartuk caah tangka an ttenh ciomi he cun tam lakte a hmu. Kawlram tangka cun MMK 13.8 million (ting 130) leng a si.

Thawng Lian nih Zuamcawh Paih 2nk laksawng $3,000 bak aa sanh ve.

Biak Hmun Sang – aingki sen

2016 ah minung tambik teitu Senthang paṭhawng Biak Hmun Sang nih minung 15 bak a tei hoi hna caah $1,000 aa ṭinpi. Kum 22 pa Surkhua arfi hi a pumrua ttha taktak, pe 5′ 11″ a sang. Aa paimi lakah a sangbik si.

2017 ah minung tambik teitu Hakha Khuathar pacak Lal Rem Ruat hi a pum hme nain paih a thiam taktak, a cak tatak fawn.

Nizaan ah minung 7 leng a tei hna, a tengh hna daan aa dawh chiahru. Paih dawhbik laksawng $500 a ngah. Lenglei in mipi nih laksawng an ṭhenhmi he cun cei lak a hmu.

Lal Rem Ruat

US in Hakha tiangah champion a ngahtu le a cunglei paṭhawng tampi zong a rak tei baltu Chuncung cakei Rung Lian Ceu aa pai lo.

US ahhin Paih tuahtu bu/committee 2 an um;

  1. North America Paih Committee (NAPC) le
  2. World Paih Championship (WPC) an si. Rung Lian Ceu hi WPC World Champion a si caah NAPC nih tuahmi paih zuamnak ah aa paih lonak a si.

NAPC Chairman Kennedy Lalram Lian nih, “NAPC le WPC hi kan i khat lo. NAPC cu Lai nunphung a simi Lai Paih hi kilven ding le mino hna thiamter ding, zuamter ding, ṭhanchoter dingah dirhmi asi. WPC cu Lai Paih in Lai paṭhawng hna nih pawcawmnak tiang a phak khawhnak dingah lam a kawlmi an si,” tiah 2018 ah fianternak ca a rak ttial.


Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2017 ah The Chin Express a dirh i ni fatin Chin thawngpang le vawlei cung thawngpang phunkip a ṭial.