UNHCR card na chuh cangmi vialte pe tthan dih hna
Senator Dean Smith sawmnak in zahan zaan ah UNHCR Lutlai le Australia Tanzung lutlai changtu (Lutlai a um lo lio si caah Caankarlak Lutlai a simi) he zaanriah an ei tti hna

Senator Dean Smith hruainak in Malaysia Chin ralzaam bu (ICC) hruaitu hna, CHRO le Australia Chin Federation (ACF) nih March 1 ah UNHCR le Australia Tanzung kan ton hna.

Kan tonmi hna cu; (1) UNHCR Malaysia lutlai Thomas Albrecht le (2) Malaysia um Australia Tanzung lutlai changtu Michael Growder hna an si.

UNHCR le Australia Tanzung sinah ICC, CHRO le ACF hruaitu nih kan halmi hna cu atanglei hna hi an si.

Ralzaam (refugee) caah halmi

  • Chin state le Myanmar ram ah buainak a um peng rih timi tehte zong kan in pek hna bantukin, Chin ralzaam hlawtnak policy hi a rannak in zohtthan uh
  • A phan thar Chin ralzaam pawl card peknak policy zohtthan uh
  • Ralzaam asi tiin UNHCR card pekmi pawl na chuhmi hna kha pe tthan dih hna
  • Tlaih le thongthlak a tongmi Chin ralzaam pawl chuah hna law Kawlram kuat an tonnak hnga lo bawm hna, lawlawse zohkhenh hna
  • 17 August 2010 hnu ah refugee card pekmi pawl ram thumnak kal dingin khua khan piak hna
  • Australia cozah nih Chin ralzaam (ahlei in fa a ngeimi pawl) tam deuh in kan lakpiak hna uh
  • Min thuat (Fraud case) ruangah aa tapmi pawl ram thumnak kalter hna uh
  • Fraud case aa mih nain a thiang cangmi paoh cu RST/DSU nih “na thiang cang” timi catlap pe dih hna, na pek rih lomi an tam tuk
  • Chungkhar laknak program ahhin aa pehtlaimi chungkhat paoh lak khawh dingin kan tuahpiak uh

Ralzaam soktu (Asylum seekers) caah halmi

  • Ralzaam soktu chungah reject cangmi pawl kha RSD interview phitnak nawl pe tthan hna uh, Chin state le Malaysia a him lo caah an him deuhnak hnga caah
  • Chin ralzaam hlawtnak policy nan zohtthanmi hi aa lim hlan paoh cu Chin ralzaam pawl card chut ti hna hlah uh
  • Hlawtnak policy nan zohtthanmi aa lim hlan paoh cu RSD interview phit ter ti hna hlah uh, a rannak in ngol uh
  • Malaysia le India um Chin ralzaam hna himnak a petu UNHCR card nan chuhmi hna hi pe tthan dih hna uh

Mi thar UNHCR card peknak kong halmi

Fa chuak thar paoh cu an nulepa UNHCR card number he aa khat in card pe dih hna uh. Chin ralzaam bu cazin i UNHCR card a ngah rih lomi pawl hi cohlang hna law card pe ve hna.

Chin Ralzaam Sianginn Kainak

Chin ralzaam ngakchia an tam tuk rih caah Chin Ralzaam Sianginn pawl hi UNHCR nih bawm peng rih hna.

Bia donghnak

UNHCR le Australia Tanzung he kan i tonmi cu a tlamtling ngai ko.

UNHCR Lutlai Thomas Albrecht nih amah kaa hrimhrim in “a biapi bikmi pawl hi dot khat hnu dot khat in kan tuah hmasa hna lai, a biapi tuk lomi pawl cu duhsah deuh in kan tuah hna lai. Cun, ‘donghternak/hlawtnak’ timi biafang hi hmang ti hna hlah usih” a ti.

Acunglei i kan halmi vialte hi zohfel tthan dingin UNHCR nih a policy a zohtthan cuahmah lio a rak si.

UNHCR Lutlai le RSD lutlai hna nih “kan policy kan zohtthan cuahmahmi hi thil ttha in bia khiah a si khawhnak hnga, Chin state chung ah a cangmi report tling tein kan pe thluahmah rih uh” a kan ti.

A tlangpi in chim ahcun, Chin hruaitu pawl, UNHCR le Australia Tanzung kan i tonmi cu a tlamtling ngaingai.

Independent Chin Communities (ACR, CRC, FRO, ZAM le Dai)
Malaysia


Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.