India Chin ralzaam tam deuh nih

India phan Chan ralzaam hna cu December 11 thokin UNHCR nih thim awk 2 lakah pakhat paoh a thimter hna. Tam deuh nih cun number 2 an i thim, tiah kan theih.

UNHCR nih India le Malaysia um Chin ralzaam paoh cu thim awk 2 a pek hna;

  1. Interview phit loin 2019 Dec 31 tiang a nungmi card kan in pek lai i a thih bak cun automatic in ralzaam in hlawt na si cang lai, timi le
  2. Ramdang zohkhenhnak ka herh rih ko na ti ahcun Ralzaam Dirhmun Biakhiahnak Interview (RSD) na phi lai i thla 2 chungah result kan in chimh lai, na sungh ahcun hlawt colh na si lai, ti hna an si.

UNHCR Delhi nih cun number 1 i thim dingin ruahnak a cheuh len hna nain December 11 ah auhmi Chin ralzaam tampi nih cun number 2 an i thim, tiah Chin Nuhrin Covo Bu (CHRO) Delhi zung tlaitu Salai Cung Dawt nih a chim.

“Tutan auhmi Chin ralzaam tampi nih cun number 2 an i thim hna. Ka theih tawk ah, nizaan kha Chin ralzaam 11 an auh hna i 10 nih number 2 an i thim.”

“Atu lio ahcun number 1 hi nan i thim ah a ttha lai lo maw tiah UNHCR nih i ruah caan a pek hna, hramhram in cun a thimter hna lo. I ruah caan cu suimilaam acheu, pakhat chung hrawng a pek hna hnu ah number 2 an i thim i interview an phi.”

India phan Chin ralzaam hna nih atu bantukin number 2 an i thimnak a ruang cu Myanmar ram ah kir an duh lo caah si loin kir hnawh awk ah a him thlu rih lo ruangah a si, tiah Salai Cung Dawt nih a chim.

“UN le Myanmar cozah nih a kirmi ralzaam pawl caah tiin zeihmanh hnatlakmi zong an ngei rih lo. Mah lak i va kir ding cu an ngamh hna lo. Ramchung ah ralkap cu hlan bantukin nawl an ngei peng rih. Mah ruang cun number 2 an i thimnak a si.”

“UNHCR nih cun, number 2 nai thim ahcun interview phit a hauh caah na sungh ahcun zeitin hmanh kan in bawm kho ti lai lo, number 1 nai thim ahcun 2019 dongh hlan ah Australia kalnak na sokmi zong ngah in kal manh khawh pei na si cu, an ti hna.”

“Number 2 nan i thim ahcun UNHCR nan zuamcawh (challenge) bantuk a si. Nan case hi pumpak case in kan in ruahpiak hna lai. Nan pumpak case cio kan zoh dih tikah nan sungh ding hi 80% aa fiang cia.”

“Number 1 i thim uh kan in tinak hna aruang cu 2019 December 31 hlan ah Australia kalnak nan sokmi ngah in kal manh khawh nan si.”

“Number 2 nan i thim i a ra laimi January thla ah interview nan sungh ahcun nan UN card chuh nan si lai, UNHCR minung nan si ti lai lo caah zohkhenh nan si ti lai lo. Australia zong nan kal kho lai lo. Myanmar ram kir nan duh zongah kan in bawm hna lai lo. Mah ruangah number 1 hi nan caah a ttha deuh an ti len hna,” tiah Salai Cung Dawt nih a chim. — Khonumthung

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.