ISIS nih Philippines RC biakinn chungah bomb an puah caah minung 20 an thi, 100 leng hliam tong

January 27, Philippines – RC biakinn chungah minung tampi an i pumh lio ah ralhrang 2 nih an nunnak pek in bomb an puah caah khrihfa 20 an thi i adang 100 leng hma an pu, tiah Philippines cozah nih a thanh.

Bomb an puahnak hmun cu Sulu pengkulh i Jolo khuate ah a ummi RC biakinn Cathedral of Our Lady of Mount Carmel ah a si.

Mindanao pengkulh hi muslim nih anmah tein khuakhan lairelnak nawl an ngeihnak hmun a si. Jolo khua cu muslim penmi Mindanao pengah kan lut lai lo tiin khuami nih vote an thlaknak zarh 1 hmanh a tlin hlan ah muslim nih bomb an puah hna hi si.

Hliam a tongmi 100 leng lakah Philippines ralkap 14 le palek 2 zong an i tel.

Philippines President Duterte aiawh biachimtu nih, “mahka peng mipi hi cozah nih a veng kho hna hnga maw tiin kan ram ral nih a kan zuamcawh mu,” tiah a chim.

“A kan zuamcawhmi cu Philippines ralkap nih an kalhnawh lai i pathian a nehsawhtu misual pawl cu an hrawh dih cikcek hna lai,” a ti.

Apa khatnak pa nih bomb taisawm aa hrukmi cu biakinn chungah a puah. Mi chanh dingin a rami ralkap le palek an umnak biakinn hmai mawttaw chiahnak hmun ah apa hnihnak pa nih a puah ve, tiah Philippines ralkap biachimtu Brig. Gen. Edgard Arevalo nih a chim.

ISIS nih, “bomb a puahtu kha kanmah kan si, kanmah nih kan fialmi hna an si…” tiah nizaan ah thawng an thanh.

Philippines ralkap le palek nih biakinn cu kan ven, hliam a tongmi vialte cu a rannak in kan tthial dih hna, tiah cozah nih thawng a thanh.

Philippines Rallkap Vuanci Delfin N. Lorenzana nih, “minung tamnak hmun le biakinn paohpaoh cu ralkap le palek nih an ven dih cang lai,” tiah thawng a thanh.

“An tuhmi theipar an zun tiang keimah le ka ralkap nih kan kawl peng hna lai,” tiah Brig. Gen. Divino Rey Pabayo Jr., Armed Forces of the Philippines Joint Task Force Sulu commander nih a chim.

UN Secretary-General António Guterres nih bomb puahtu cu a mawhchiat hna pinah, “mah thil a tuahtu hi a rannak in a theipar zunter hna uh,” a ti.


Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. The Chin Express dirh a duh caah 2017 ah RSC ah rian dinhnak ca a ap i ni fatin Chin thawngpang le vawlei cung thawngpang phunkip a ṭial.