Israel scientists nih tu hnu kum 1 chungah cancer hrik tlau cikcek in a that khomi sii kan ser khawh lai an ti, tiah Israel media The Jerusalem Post nih a ttial.
Zapi ruahnak ahcun a si kho lo ding a lo. Nain, a taktak si ko tiah Israel scientists nih an chim.
Sii kan sermi hmanh cu, a man fawi lai pinah cancer zawtnak a ngeimi nih an hman tikah rau lo te ah an dam lai, kan sii nih cun an pum dangdang caah harnak (side-effect) a chuahpi fawn lai lo, an ti.
Israel sii sertu company Accelerated Evolution Biotechnologies Ltd. (AEBi) i an chairman Dan Aridor nih, “kum 1 chungah cancer thiang cikcek in a damh khomi sii kan ser khawh lai ti kan zumh taktak ko,” a ti.
AEBi cu kum 2000 ahkhan Israel ram Ness Ziona khua ah an rak dirhmi a si.
Cancer hrik a thattu ding amino acids 2 hrawng le sivai/toxin cawh in sii cu an ser lai.
2018 chungah cancer zawtnak lawngin a thimi hi 9.6 million an si. Pa 5 lakah 1 le nu 6 lakah 1 hi cu an nun chungah cancer an ngei dih, tiah Vawlei Ngandamnak Bu (WHO) ttengnge a simi Ramkip Cancer Sii Kawlnak Bu (IARC) nih a thanh.
Vawlei cung minung a thimi vialte i 6 lakah 1 hi cu cancer zawtnak lawngte a si.
Vawlei cung ahhin lung zawtnak in a thimi an tambik, a changtu ah cancer a si.
Israel scientist pawl nih man fawi tein cancer thiang cikcek in a damh khomi sii an ser khawh taktak ahcun tuanbia an thlen ko lai.
