Joseph Kung Za Hmung

Joseph Kung Za Hmung nih a Facebook ah atanglei bangin thawng a thanh.

Thawngthanh – UNHCR Malaysia zung nih Malaysia phan Chinmi hna cu 2019 thokin ram thumnak ah kan kua ti hna lai lo, tiah thawng a thanh cang. 

Cucaah, Myanmar ramah kir a duhmi cu phungning tein nan kir khawhnak hnga 2019 thokin CAD bu nih kanmah tangka in kan in bawmh hna lai, tiah thawng kan thanh hna.

Joseph Kung Za Hmung

Thawngthanhnak a tuahmi cu Facebook ah an soisel ngai, “Malaysia le India um Chinmi hna nih kir an duh rih lo, CHRO le adang kan pale hna nih ram thumnak cozah sinah an nawlpiak hna lio ah hitin kirnak khua a khaangmi nan rak um hi cu a poi ngai, a dil na, a sat na nan si ko,” an ti.

Joseph Kung Za Hmung nih, “zeidah a ra chuak lai timi cu ka theih cang ko. No an ti lai. I zuam ve ko hna seh. Kan i zuam ve ko lai,” a ti.

Fact-check: 2019 thokin Malaysia phan Chinmi hna ram thumnak ah kan kua ti hna lai lo, tiah UNHCR nih thawng a thanh bal lo. 2019 Dec 31 tiang a nungmi card kan pek hna lai, a ti. 2020 January 1 hnu in card pek nan si ti lai lo tinak a si.

Malaysia um Chin ralzaam hna kirnak caah ttuanvo lak aa timmi bu 3 an um cang

  1. Salai Isaac Khen bu
  2. ACSY le
  3. Joseph Kung Za Hmung bu CAD hna an si

Salai Isaac Khen bu nih August 4 ah, “Malaysia Chin ralzaam hna kirnak caah Myanmar cozah nih zeital timhpiakmi a ngei hna maw, cozah sinah zeital kan halpiak kho hna lai maw,… ti pawl meeting ah kan ceih,” an rak ti.

All Chin Society Yangon (ACSY) nih, “Salai Isaan Khen bu hi kanmah sinah fonh a duh cun i fonh seh, a herh cun Chin ralzaam hna kirnak kong cu Myanmar cozah nawl peknak in asiloah Myanmar cozah lam hruai ningin kanmah nih ttuanvo kan lak te lai caah Isaac Khen bu hi kan sinah aa fonh duh lo ahcun hmailei ah an tonmi thil kongah kan i ceih lai lo,” tiah cathluan a chuah.

Ruah len awk: Malaysia um Chinmi hna ram thumnak an kal khawhnak hnga caah CHRO le adang kan pale pawl nih ‘UNHCR biachahmi hi thil dik a si lo‘ tiin cathluan an chuah i ramdang cozah an ton hna, Asia nuhrin covo bu le Asia ralzaam covo bu zong nih an dirpi hna.

Mah lio ah kirnak kong ttuanvo lak aa timmi an rak um hi Malaysia um Chinmi an dawt tuk hna ruangah a si hnga maw? Puanzar phen ah an i tinhmi zei si hnga?

Adang rel awk: ACSY a cattial daan hi Salai Isaac Khen bu he Malaysia Chinmi kirnak ttuanvo lak an i cuh bia si maw?

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2017 ah The Chin Express a dirh i ni fatin Chin thawngpang le vawlei cung thawngpang phunkip a ṭial.