2008 phunghram remh ding kong lungtlin, hnatlak can ah Sagaing ramtthen, Kalaymyo ah tuni zingka ahkhan khuami 1,000 leng nih duhnak an langhter.
Khuami thong 1 le 500 hrawng cu Kalaymyo i Shwe Bon Thar Pagoda in an i thawh i Boyoke milem an phunnak hmun tiang lam an zawh.
2008 phunghram remh lungtlin langhternak hruaitu Kalaymyo peng NLD party chairman U Bah Myint nih “Hmailei kan techin, fapar hna caah a tha i a himmi ram pakhat sernak ding ahcun 2008 phunghram hi kan remh a hau,” tiah a chim.
“Atu caan hi 2008 phunghram remhnak dingah caantha tuk a si. Atu ah kan remh lo ahcun hmailei kan ram caah a tha lai lo.”
“Cu ruangah, kan techin, fapar hna ro pek can le a thami ram ser kan duh ruangah 2008 phunghram remh kan timh hi a si. Ramchung deihnak le democracy ram sernak ding phunghram remh lo cun a si kho lai lo,” tiah a chimchap.
Atu hi NLD cozah nih 2008 phunghram remh tu bu a dirh.
_ Khonumthung
