Kalay Ah Laithil Tah Rian Aa Ngolmi An Tam

Sagaing ramtthen, Kalaymyo peng i Laithil tah rian ah la man a kai ruang le rianttuantu an zor ruangah rian ngolmi a tam ngai tiah Kalaymyo peng i Laithil Tahnak Company chairman U Myo Myint nih a chim.

Kalaymyo ah Lai thil tahnak i an hman bikmi la pawl hi India ram le China ram in a rami an si hna. Atu lio hi India la man a kai ngai.

“La pawl hi India le China ah kanmah tein kan i cah kho lo. Mi cawkciami tu kha kanmah nih kan cawk chin, la man zong a kai tikah a let in tangka kan dih. Cu tikah, rianttuantu nihlawh pekmi he aa keih ti lo i rian aa ngolmi an tampi,” tiah chairman nih cun a chim.

“Rianttuantu an tlawm chin lengmang. Laithil man cheu 3 ah cheu 1 lawng kan pek hna. Dawr nih lai thil zun khat kyat 15,000 in an zuarmi khi kanmah sin ah kyat 8,000/9,000 in an lakmi a si. Thiam taktu pawl cu kyat 3,000 lawng kan pek hna. A tlawmtuk tikah ttuan an duh ti lo. Mah nakin nikhat nihlawh in lamphah rianttuan hmanh an duh deuh,” tiah a chimchap.

Kalaymyo ah Laithil hi a man pinah a zuartu caah a miak ngai ko nain a taktu caah cun a miak um ti lo caah 2015 hnu khan thiamtah nak seh 2,000 an hmang ti lo.

Azi cu Faiceu Journal website ah kum 1 leng thawnggpang a leh hnu ah The Chin Express (theihtlei.com, thechinexpress.com le thechinexpress.info) ah kum 3 chung thawngpang 2,000 leng a let/ṭial cang.