Kalaymyo, Tahan Sang Ah Mi Thil Chuh Hmang Misual Bu An Um

Chinmi tampi an umnak Kalaymyo, Tahan le Sanmyo sang ah naihrawng mi zei ti hngalh lomi misual bu nih lam aa chawkmi thingtan in an tuk hna i an thil an chuh hna tiah Khonumthung nih a ttial.

Misual bu cu motorcycle 1 ah minung 3 an i cit i thingtan 1 an i put. Lam ah aa chawklet mi mipi cu mi an um lonak hmun ah teng ko in thingtan in an thuk hnu ah an phone, tangkabawm le thil mansung an lakpiak hna.

Tahan (B) sang ah a ummi Pi Sapneli cu October thla thok ka ahkhan a chungle inn ah a leng i zaan sml 9 hrawng ah inn a tin lei ah misual bu nih cun thingtan in an tuk.

“Motorcyle mei van lo in ka hnulei in an ka zulh. Thingtan in an ka tuk hmanh kaa thei lo, an rang tuk. Ka hna fak i kaa tongh hnu lawngah thingtan in an ka tuk kaa theih. Sang mipakhat nih a ka hmuh i mi nih maw an i tuk tiah a ka hal. Mah ahcun misual pawl cu an zaam cang.”

“Thingtan in an ka tuk ka ahhin an zaam colh lo. Ka tluk tiang an ka hngah. Tangkabawm ka ken, ka sui tthi zong a langh tikah chuh dingin an ka dawi hi si lai. Sang mi pakhat nih a ka zuan hnawh manh caah an zaam. A va dawi hna nain a phan ti hna lo,” tiah Pi Sapneli nih a chim.

October thla thok tthiamtthiam ah Sanmyo sang ah nu pakhat le Tahan (B) sang um Pu Pavuta fapa Zuia zong YCW pawng ah thingtan in an tuk hna.

Cun, September thla dih lai zong ah atu bantuk in thingtan tuk a tongmi 5 an um ti a si.

“Thingtan tuk a tongmi nih palik sakhan ah thawngthanhnak an tuah lo ruangah fawi tein dantat khawh an si lo. Mivengtu tam deuh in kan chiah,” tiah Tahan palik bawi U Hlah Han nih a chim.

“Tahan sang le Sanmyo sang ah Meithat bu, Tahan sang upa le palik i bawm in zaan fatin zaan sml 1 in 2 tiang sang chungah kan i chok,” tiah a chimchap.

Azi cu Faiceu Journal website ah kum 1 leng thawnggpang a leh hnu ah The Chin Express (theihtlei.com, thechinexpress.com le thechinexpress.info) ah kum 3 chung thawngpang 2,000 leng a let/ṭial cang.