Kum fate Google nih kum khat chung ah vawlei mi vialte nih an kawl bikmi (year in search) timi hi an langhter lengmang.

Kan hnu kum (2017) i kawl bikmi lakah aa telmi cu:

© North Korea neuclear nih US a phan kho hnga maw?

© Vawlei cung ah refugees minung zeizet dah a um?

© Thlichia le tilet in zeitindah kan i ven lai?

© Zeitindah ttihnak ngei loin kan nun khawh lai?

Ti bantuk pawl hi an si bik. Kan kawl bikmi hna hi “ttihphannak chung in luatnak ding lam” hmuhsaktu lawngte an si. Vawlei mi vialte nih kan duh bikmi le kan kawl bikmi cu harnak, ttihnak le ralkut in luatnak a si ti cu kan kawl mi nihhin fiang tein a langhter ko!

Amak ngaimi pakhat bal cu, 2017 ah vawlei mi vialte nih google ah an kawl bikmi biafang (tlangtar) 100 lak ah “Pathian” timi biafang aa tel lo, 200 lak zong ah aa tel lo, 300 lak zong ah aa tel hlei lo!

“Pathian” timi biafang hi google nih kum fate kawl bikmi biafang (year in search) tuah hram a thok in nihin tiang ah voikhat hmanh kawl bikmi biafang ah aa tel bal rih lo.

A fiangmi cu, vawlei minung nih hnangamnak le himnak cu kan kawl bak nain Pathian bal cu kan kawl bak lo tinak a si.

Himnak le hnangamnak cu hei ngei hmanh u sihlaw Pathian kan mgeih lo ahcun hna a ngam hlei hnga lo, tihi a ruah awk kan hngal tawn lo.

Ralkap nih hriamnam tling he cawnghmi inn chung um zong ah Pathian hngalh ta lo ahcun an hna a ngam kho hlei lo; anmah tein pistol an chantling tang ah an i chiah thiamthiam ko!

Zumtu tam deuh nihcun Pathian hi US/Ausie hrawng i nau-umtu hman in kan hman tawn. Kan i khawn den sualnak hnga lo zohkhenhtu le vengtu sawhsawh lawng ah kan duh i a kan chimhringtu le fungfek in a kan tu tu ding ahcun kan duh lo.

A harnak zawn poh ah kan auh i a fawinak le a nuamhnak zawn poh ah kan philh; kan harnak caan ah kan hngalh bantuk in kan lunglawmhnak caan ah hngalh ve a duhtu Pathian a si!

Hnangmnak kawl in kal kan i thawh lio ahcun Pathian nih a hngal tawn lo nain hnangamnak le nuamhnak kan kawlnak i rul nih a kan cuk le kan kalnak lam a cim/min caan lawng ah Pathian kan hngalhter tawn khah; ‘ziah, hi kaa na phanh ka hngalh tung lo” tiah lungfak in kan Pathian mitthli he kan chiah caan a tam hringhran!

Bawipa nih thluachuah in pe hna seh!

Cattialtu: Pastor Hram bik Lian

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2017 ah The Chin Express a dirh i ni fatin Chin thawngpang le vawlei cung thawngpang phunkip a ṭial.

Zeitin na ruah?

Zaangfah na comment ṭial!
Zaangfah tein ka hin a min ṭial