Khuang Par a thattu Peter Van Bawi Lian cu Thailand ah a zaam
Peter Van Bawi Lian le Khuang Par
  • Khuang Par ruak an hmuh cangka in Thailand ah a zaam
  • US Ralkap sin zongah thawng a thanh lo caah ralkap nih an kawl ve

Indianapolis, US – Kum 21 pa Peter Van Bawi Lian cu a nupi Khuang Par @Khuang Hliang Par that dingin December 22 ah Colorado in Indianapolis khua ah vanlawng in a zuang.

Khuang Par, kum 27 le Peter Van Bawi Lian cu Colorado ah an um. November thla ah Peter Van Bawi Lian nih a hrom a dih i “kan thah lai!” a ti hnu ah palek nih an tlaih.

December 1 ah, Khuang Par cu Indianapolis i a ule sinah um dingin a ra. Peter Van Bawi Lian nih a rat hnawh i a thah.

Khuang Par ruak cu December 23 zingka 10am ah Indianapolis khua, Country Club Apartments pawngah a ummi hnawmpung nganpi chung i suitcase chungah an hmuh.

“Khuang Par a thah” tiin Nithumni ah Peter Van Bawi Lian cu palek nih biaceihzung ah taza an cuai.

Peter Van Bawi Lian, kum 21 hi US ralkap a si. Cunglei ah nawl hal loin a bau. Ralkap nih an chawnh khawh ti lo ruangah “cunglei ah thawngthanh loin ralkap rian a kaltak” tiah ralkap nih an kawl ve lio a si.

Peter Van Bawi Lian

Khuang Par ruak an hmuh ning

December 23 zingka 10am ah inn-ngeilo (homeless) nu nih hnawm a hlonh lio ah hnawmpung chungah suitcase a hmuh. Suitcase cu a zit aa hrenh dih lo. Hon loin a purh tikah miruak a tongh.

Hnawmpung pawng i apartment ah a ummi pa a chimh colh. “Hnawmpung cu ka va zoh i zit aa hrenh dih lomi zawn in miruak hrap-cheu ka hmuh caah 911 ka chawnh colh,” tiah mipa nih palek sinah a chim.

Ruak checktu pawl nih Khuang Par ruak an check hnu ah “mi nih thahmi a si” tiah an fehter.

Peter Van Bawi Lian nih Indianapolis ah thah dingin a kal hnawh

Peter Van Bawi Lian cu December 21 tiang lawng kha Colorado Springs khua i Ralkap Sakhan ah a um.

December 22 zingka ah Colorado Springs in vanlawng aa cit i chun hnu ah Chicago khua i O’Hare Airport a phan. A zuang tthan i zaanlei 4pm ah Indianapolis khua a phan, tiah Indianapolis palek nih an chim.

December 23 zingka i Khuang Par ruak an hmuh cangka in Peter Van Bawi Lian cu Hong Kong ah a zuang tthan. December 24 ah Thailand khualipi Bangkok a phan, tiah palek nih an chim.

Peter Van Bawi Lian hi December 26 ah Ralkap Sakhan ah rianttuan (duty) aa thawh ding a si nain a chuak ti lo. Ralkap zong nih an chawn kho ti lo.

Ralkap bawi pawl nih “nawl hal loin a bau (AWOL), cunglei ah thawngthanh loin ralkap rian a kaltak” tiin December 26 ah biaceihzung ah ca an ap.

Atu hi Peter Van Bawi Lian cu Thailand ram ah a um ti maw, khuazei sat ah dah a um ti cu palek zong nih an hngal kho rih lo.

Peter Van Bawi Lian hi hlan ahcun Indianapolis ah a chungkhar he khua a rak sami an si. A nulepa cu atutiang Indianapolis khua ah an um peng rih ko.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.