Kir duhmi Chin ralzaam pawl Myanmar cozah le ACS nih kan in bawmh hna lai
Malaysia Chinmi pawl nih 'kir kan duh lo, na biachahmi hi let...' tiin UN zung hmai ah duhlonak an langhter lio

Yangon – Malaysia le India phan Chin ralzaam hna chungah, kir a duhmi pawl cu Yangon um All Chin Society le Myanmar cozah nih kan si khawh chungin kan bawmh hna lai, tiah Peter Cung nih a chim.

Chin ralzaam kong he pehtlai in, All Chin Society – Yangon (ACSY) upa pawl nih November 3 ahkhan Vice President Henry Van Thio kan va ton hnu ah, Myanmar cozah le ACSY i bawm in ramdang phan Chin ralzaam pawl cu kan bawmh hna lai tiah hnatlaknak kan ngei, tiah ACSY Chairman Pu Peter Cung nih a chim.

“UN nih Chin ralzaam donghter dingin thawng a thanh caah Chin ralzaam cheukhat cu Kawlram kan kir ahcun airport ah a kan tlaih sual lai ti an phang. Kawlram an phak tik zongah, chungkhar cazin le hmatpungttin ngahnak kong, umnak hmunhma kong ah an lungrethei.”

“Kir a duhmi nih kan sinah bawmh a kan hal ahcun, cozah he i bawm in kan si khawh chungin kan bawmh hna lai. Nain, anmah nih bawmh a kan hal lawngah kan bawmh hna lai,” tiah Peter Cung nih a chim.

Chin state a dai in a him cang caah Chin ralzaam pawl cu UNHCR nih kan in zohkhenh ti hna lai lo, nan ram ah nan kir kho cang, tiah UNHCR nih June 13 ah thawng a rak thanh.

Malaysia le ramdang Chin upa pawl nih UNHCR thawngthanhmi cu an doh i letter dingin an i zuam cuahmah nain, Kawlram ah a ummi Chin upa pawl nih cun UNHCR thawngthanhmi cu doh loin UNHCR lei ttangin Chin ralzaam kirnak khua tu an rak khan ve ai.

2018 August 1 thokin UNHCR nih Chin ralzaam a donghter thluahmah cang i 2019 December 31 ah a donghter dih lai.

UNHCR biakhiahmi le thawngthanhmi cu Malaysia, India le ramdang Chin upa pawl, Chin Nuhrin Covo Bu (CHRO) zong nih a si khawh chungin an doh i let ko sawh, an ti peng.

Atu lio ahhin UNHCR cazin ah ralzaam le ralzaam-soktu UN card le catlap aa tlaih Chinmi 30,000 hrawng kan um. UN card le catlap a ngei lomi he fonh ahcun 50,000 hrawng kan si.

India ram ah, UN card aa tlaihmi Chin ralzaam 5,000 hrawng an um ve.

All Chin Society – Yangon (ACSY) bu cu, Yangon um Chin miphun 19 nih kum 2017 ah an dirhmi a si.

Ramdang phan Chin ralzaam hna nih ACSY sinah bawmh hal nan duh ahcun atanglei phone number ah chawnh khawh a si;

Pu Peter Cung (Chairman) – 095409980

Pu Nai Thang (Secretary) – 09420286734

ဦးဝုန္ဆြင္းထန္ (ဒါရိုက္တာ) – 09254948754

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.