Lailenpi Airport cu 2020 May ah lim dawh asi ko

2020 May thla ah lim dingin sak cuahmahmi Lailenpi Airport hme cu, ruahpi a tuk tuk lengmang nain July thla dongh tiang ahcun kan rak timh cia ning tein rian hma a kal peng ko, tiah ttuanvo ngeitu MAF Myanmar nih a thanh.

Vanlawng tliknak lam caah a herhmi lung zong cawh hram kan thok cang. Hi airport saknak ah hruaitu a simi Terry le New Asia Star Khat team cu ni fatin fakpi in an ttuan peng, ati.

Minung 18 tlum, a herhnak paoh-hmanmi vanlawng hme ttumnak caah sakmi Lailenpi Airport hme cu 2018 November thla ah sak an thok.

$2.2 million dih in sak cuahmahmi airport cu vawlei cung ram 30 lengah sifak a bawm i airport a sakpiak hna tu Mission Aviation Fellowship (MAF) le Health and Hope dirhtu Dr Sa Sa nih mi bawmhnak in an sakmi asi.

Vanlawng tliknak lam phah awk ah lung an cawhmi

2020 May thla ah lim i onnak puai tuah hnu ah Myanmar Cozah pek an timh. Myanmar cozah ta asi te lai.

MAF cu 2014 ah Myanmar ram ah a lut i Myanmar cozah sinah “MAF Myanmar” tiin company license zong a lak cang.

Lailenpi Airport an lim hnu ahcun, Yangon in ni 4 leng kalmi Lailenpi khua cu minutes 90 ah phak khawh asi cang lai.

Vice President Henry Van Thio cu February 2017 ah Lailenpi khua ah a va tlung i sizung, lam, le khua inn, tbk., saknak caah cozah bawmhnak $1 million leng a pek hna. MAF hruaitu le Dr Sa Sa zong a ton hna i Lailenpi Airport saknak nawl a pek hna.

Falam khua pawng Surbung tlang zongah cozah nih $20 million dih in Surbung Airport a sak cuahmah. 2020 September ah lim dingin an sak liopi asi ve. Vanlawng nganmi a ttum kho te lai.

Kawlram chung state/region 14 lakah Chin state lawng hi airport a um rih lomi asi. Adang state paoh cu Yangon in vanlawng in tlawn khawh dih an si cang.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2017 ah The Chin Express a dirh i ni fatin Chin thawngpang le vawlei cung thawngpang phunkip a ṭial.