Lai miphun, Laiholh le Laica, Lai nunphung sang chin seh.

Kan Lai nunphung ni sunglawi lak ah aa telmi pakhat Hlukhla Kuut cu Mizoram chungum Lai District Khualipi Lawngtlai khuapi ah hlunghlai tak in an tuah lai tiah theih a si. Laimi nih Ni sunglawi hi phunli kan ngei i, “Lai Miphun Ni(Chin National Day) Hlukhla Kuut, Tho (Lai Kumthar) le Kuut” tiin phunli an si.

Mah hna lak ah Hlukhla hi khuathlang lei Laimi nih an pehzulh i, Tho hi khuachak lei Laimi nih an tuah vemi a si. “Tho” hi cu Lai “Kum Thar” tiah Pupa hna nih sullam an ngeih termi zong a si. Kuut timi zong hi adang tein tuahmi kan rak ngei nain chanthar ahcun kan tuah ti lomi a si.

Tho le Hlukhla hi LAIMI nih kan tuah pengmi cu a si rih. Cucaah atu a ralai mi February 26-27-2019 ahkhin Hlukhla Kuut cu nuam taktak in West Lairam Lawngtlai Khuapi ah an hmang hna lai. Laimi Miphunpi kan sinak lungput sang ah kan hlorh t’han cang lai.

Mah Hlukhla Ni sunglawi ahhin Chin State Laimi(Myanmar) le Bawm Laimi(Bangladesh) hna laam phu in an ra lai i, pumpak zongin a rak zawhmi an um len lai tiah theih a si. Hmunkip ramkip Laimi ka si aa timi vialte zong rak i tel ve dingin sawm kan si, Lai miphun si hi Pathian thawngin a nuam chin lengmang cang.

West Lairam LADC Cozah ram hruaitu hna zong upat awk tlak in rian an tuan chin lengmang cang i, Lawngtlai le Siaha District a ummi Laimi vialte Miphun ah i t’hanghphawk cang hna usih tihi saduhthah bik le chunmang hmuitinh a si. Atu Hlukhla an tuahmi ahhin Laiholh tein caan an hmang lai tiah kan theih fawn.

Atu Hlukhla an tuahnak ding Lawngtlai peng chung ahhin milu 86,000 hrawng an um i Laimi hi milu 70,000 hrawng an si tiah kan theih. Adang hi Mizo le miphun dang hna an si.

Cu lawng siloin Lai Autonomous Disrict Council he aa pehmi Peng khat Mara Autonomous District Council(Mizoram state, Siaha District) ahhin milu 56,000 hi Laiholh aa hrawm kho ding an si, hi chungah milu 20,000 renglo hi Halkha Thantlang Laimi an si i, a dang hi Mara Laimi an si.

Cu Mara Laimi hna cu cheu 5 ah cheu 4 cu an hrihhram zawt tikah Halkha Thantlang hrinphun clans lawngte an si tiah kan hmuh chuah khawh. Atutan Hlukhla ahhin LAWNGTLAI Laimi hna nih vawleicung Laimi vialte hna sinah Laimi nunphung dawh ngei kan sinak le limhaang ngeimi miphun kan sinak cu an langhternak Ni sunglawi a si lai caah Laimi vialte nih telpi i zuam cio hna usih.

Laimi kan si
Laiholh cu kan holh
Laica cu kan ca
Miphun dawt cu Pathian duhmi a si.
Amen.

By: Salai Thomas Lian

Ch:
–Salai Thomas Lian Thihlum.
– Salai Lahnim FB.
– Lawngtlai Future Group.

Azi cu Faiceu Journal website ah kum 1 leng thawnggpang a leh hnu ah The Chin Express (theihtlei.com, thechinexpress.com le thechinexpress.info) ah kum 3 chung thawngpang 2,000 leng a let/ṭial cang.