Kayah State, Loikaw khuapi ah phunmi Bogyoke Aung San milem phawi ding le state vuanci choh a rian i phuak dingin tuni ah Kayah mipi nih duhnak an langhter.

Duhnak a langhtertu mipi cu palek nih lam an kham hna i ti le khaihriat meithal kuan in an kah hna. Minung 4 cu khaihriat meithal kuan nih an hmai, an tang le an paw ah thi chuak lakin a khen hna.

Nain, an nunnak caah thinphan ding um lo ti a si.

Tuni hi Myanmar Union Day a si i Kayah Mino hruainak in mi thong tampi nih lam ah duhnak an langhter.

Bogyoke Aung San rang aa citmi milem cu Kayah state vuanci choh U Maw Maw le NLD party chungtel pawl hruainak in January 29 ah khan Kandar Haywun Park ah an phun.

Aung San Milem hon puai an tuah lio

February 2 ahkhan mipi duh lo buin cohlannak le honnak puai an tuah.

Mah lio ahhin Kayah mipi cheukhat cu Kandar Haywun Park pawngah duh lonak an langhter i mino 40 leng tazacuai an rak tong.

Tuni ah mipi nih Aung San milem konghe pehtlai in a cawlcang biktu state vuanci choh U Maw Maw cu a rian in i phuak ding, Kandar Haywun Park ah phunmi Aung San milem phawi ding le tazacuaimi Kayah mino 40 leng thlah colh dingin duhnak an langhter. _ The Irrawaddy

Azi cu Faiceu Journal website ah kum 1 leng thawnggpang a leh hnu ah The Chin Express (theihtlei.com, thechinexpress.com le thechinexpress.info) ah kum 3 chung thawngpang 2,000 leng a let/ṭial cang.