Hong Kong action movie ‘Line Walker 2’ cu February 18 in Yangon khuapi hmun tampi ah thlak an thok i Kawlram minthang chungin Aung Min Myat, Min Yar Zar, Lin Aung Khet le a dang minthagn tampi an i tel.

Line Walker 2 lemcang caah Kawlram in minthang an thim hna lio ah Nyinanda, Tun Ko Ko le model Thin Thin cu i tel dingin fehter si cang nain let (cancelled) an si. An lungfak ngai. Ruahpiak ahcun an mawh hrim lo.

Nyi Nanda: Keimah he aa thei ngaimi pakhat nih phone a ka chawnh i Hong Kong directior pawl Myanmar ah an ra hnik i zarh khat hrawng video thlak an tim. Na huam ve maw tiah a ka ti.

Ka huam ko, ka rian cu pei si cu ka ti. Special Commander in lemcang ding ka si. A tlawmbik $1,500 le a tambik $2,500 an in pek lai a ka ti. Na hmanthlak rak kan kua a ti. Ka hmanthlak cu Viber cu ka kuat hna.

February 13 ah phone an ka chawnh than i na kan tong kho ta hnga ma an ka ti. February 14 zinglei sml 10 ah kan i tong hna i Hong Kong in director bawmtu zong a um. Lem ka can dingmi kha an ka tuahter chun.

An lungtling i form ka phih mi catlap cungah ok tiin an tial. Zeizat dah pek na duh lai an ka ti. Ri khiahmi ka ngei lo ka ti hna. Nain, tuan ahkhan a tlawmbik $1,500 si lai an timi kha ka lung ah cam tuk i $700 siseh ka ti hna. Nang cu ni khat te lawng lemcang ding na si i $400 hrawng pek na si lai an ka ti. A ngah ko ka ti hna.

Kan in chawnh than te lai an ka ti. February 15 ah phone ka chawnh hna i a fiang rih lo an ti. Kei nih le Shwebo ah rian ka ngei fawn. An ka thim lo ding si cun tuan te ah rak ka chim hna sehlaw tha tuk hnga.

February 16 ah phone ka chawnh hna phone an thah. Tlawmpal ah anmah nih an rak ka chawnh tthan. Zeitin kan in chimh lai tiawk bak kan hngal lo. Nangmah ai ah $100 in midang kan fial cang hna an ka ti ko.

Ka lau ko. Aho an kan thim kha a poimi si lo. Nain, an thiltuahmi cu a dik lo. Ka lungfak pah ko.

Tun Ko Ko: Phone an ka chawnh i Hong Kong in movie rak thlak an timh caah na huam hnga maw tiah an ka ti. Ton kan in duh ko an ka ti.

International movie sipin ah ramdangmi i thlak ding cu ka duh ngai vemi a si ca ah February 14 ah ka va ton hna. Interview an ka tuah lio ah a tlawmbik $500 le a tambik $1,500 kan in pek lai, si kho lai maw an ti. A ngah ko ka ti hna.

February 16 zaan ah phone an ka chawnh i lemcang dingin thim na si i ni khat ah $400 kan in pek lai an ti. Thim ka si tikah kaa nuam ngai. Elaw ka ti hna. Tangka kha biapi si lo, anmah sin in thiamnak ngah kha ka duhmi a si.

Assistant director he zong kan i chawn chap. February 17 zinglei ah a herhmi timhlamh dingin an ka chimh. Zaan cu ka it ko. February 17 zinglei ah phone an ka chawnh than i $200 lawng kan pek khawh an ti caah kanmah nih kan cancel tiah Myanmar i agency lei rianttuan pakhat nih a ka chawnh.

Ka khuaruahhar ko. Tangka cu a biapi mi si lo ka ti. $200 lawng si. Cun, nangmah caah hmun a um ti lo an ka ti. Ka lau ko. An kan duh lo ding si cun tuan te in an chim ding si ko. Rian zong kan thlau dih.

Thin Thin: February 18 ah Line Walker 2 thlak kan thok cang lai an ti bak ah an ka let. Ka lungnuam lo bak. Zeitik hmanh ah ka philh ti lai lo.

Movie thlak an thok hnik bak ah atu lio Wai Luh Kyaw he tazacuai mi kong ruangah kan in let an ti ko. Ka mitthli zong ha dih. Mah kong he cun zeidah aa sai ka ti. Ruat cio ko hmanh uh.

Cun, Line Walker 2 ahhin Myanmar ram langhter a si ve tikah i tel kha ka duh tuk ve. Mah i an ka let kha cu ka ngaihchia kho tuk. Facebook ah live in ka lungum bia zong ka chim len. _ MC

Azi cu Faiceu Journal website ah kum 1 leng thawnggpang a leh hnu ah The Chin Express (theihtlei.com, thechinexpress.com le thechinexpress.info) ah kum 3 chung thawngpang 2,000 leng a let/ṭial cang.