Kan hnu zarh kha Chin state Paletwa pengah Kawl Ralkap le AA fak tukin an i kah caah Paletwa pengah minung 250 hrawng nih an inn an zaamtak i Bangladesh ram an phan, tiah minung covo bu rianttuan pakhat nih a chim.

Dornak, rawl le hnipuan an ngeih lo caah ngakchia pawl cu thi dengin an zaw, a ti.

Sii le herhhai bawmtu pawl nih bawmh an timh ko hna nain an zaamnak hmun hi kal a har tuk caah an bawm kho rih hna lo.

Bawm/Chin mi tampi an umnak Bangladesh ram, Bandarban District Nuhrin Covo Bu ah rian a ttuanmi Win Thein nih, “kan hnu zarhdongh ahkhan ramtang lam hlapi ah a ummi Thuisa Para khuate pawngah Chin state ralzaam 250 hrawng cu ka va ton hna,” tiah a chim.

“An phanhnak hmun hi Bangladesh Ramri Hngak Ralkap Sakhan in 11km hrawng a hlatnak zawn ah a si.”

“Ralzaam pawl nih, kan hnu zarh ahkhan Paletwa peng chaklei ah a ummi Kha Maung Wa le Kin Ta Lin khuate ah Myanmar Ralkap nih kan inn a kan khanghpiak, an ti.”

“Zarhpini ahkhan Chinmi 124 cu Bandarban District i Ruma pengah an phan. A thaizing ah, Paletwa peng khuate kenkip in Arakan miphun minung 126 cu mahka hmun tthiam ah an rung phan ve.”

“Mahka hmun hi tilawng le mawttaw zongin kal khawh a si lo. Ke in kal lawngin phak khawh a si. Ruma pengin ni 1 hrawng a rau,” tiah Win Thein nih a chim.

“Ngakchia 60 an i tel, a chuakka tete zong an um. Puan le angki lum zong an ngei lo. Thilpuan lum an ngeih lo caah ngakchia pawl kik nih a tlaih hna lai ti phan a um tuk. Nikhatni thokin ngakchia 5 cu lungfim loin an zaw cang.”

“Ruma peng ka kir hnu ah, Chin state ralzaam pawl cu bawm dingin sibawi le mi bawmtu tlawmpal ka thlah hna.”

“Atu lio cu tlangpar ah a kih taktak caan a si. Myanmar ram Shan state i tlangpar kik sawhsawh bantuk a si lo.”

“Ralzaam pawl cu Thuisa khuate ah luhnak nawl an pe hna lo. Mahka khua ahhin ralzaam caah umnak hmun hrimhrim khi a umlo. An khua ningin pharh inn le khuacaan hoih thingthei in khuasami an si. Meilah le rua-tlah in tahmi kho lawng an ngeih.”

“Mahka hmun hi phone line/signal zong a umlo caah ralzaam pawl cu atu hi zei an lawh zong ka thei kho rih lo,” a ti.

Ruma peng mihar bawmtu a si vemi Aye Tun nih, “Chin state in a zaammi Chin le Arakan ralzaam pawl cu ka va ton ve hna. An umnak hi Ruma peng le Remakri ramtthen ramri, Ramakri chungah a si,” tiah a chim.

“Ralzaam pawl chikhat dornak buk saknak caah plastic chah (tarpaulin) va phorh dingin khua kan khan cuahmah.”

“Bangladesh khuami Marma pawl nih rawl zong an pek pah hna. Atutiang ahcun Bangladesh cozah nih zei taktak hmanh a bawm rih hna lo.”

“Mahka hmun hi cu upa pipi hmanh thilpuan lum loin um khawh a si lo. Ngakchia pawl zaan ah puan loin vawlei ah an ih ding cu ruat cio hmanh uh,” a ti.

“Paletwa peng, inn 40 hrawng a simi Kin Ta Lin le inn 60 hrawng a simi Kha Muang Wa khuate ah ralkap nih inn cheukhat a kan khanghpiak, tiah ralzaam nih an ka chimh.”

“Atu hi an khua ningin inn a kaang dih cang maw ti cu ka hngal kho ve rih lo.”

“Hmasa ahcun Kyauktaw le Paletwa peng chung lam nai khua ah zaam kan i tim ko nain ni 7 chung an i kah cang caah Bangladesh ah kan rak zaam i ni 2 chung ke in kan kai i kaahi kan phan, an ti,” tiah a chimchap.

India ramri zongah Paletwa pengin a zaammi Chin miphun minung 120 an phan. AA ralkap sinah an um.

AA biachimtu U Khine Thuka nih, “Chinmi 120 cu an zaam i kanmah umnak India ramri pawng an rung phan. Ral a thawh cangka in harnak fak tuk an tong, chungkhar minung aa thlaumi zong tampi an um,” tiah a chim.

Aye Thein nih, “nai ah Bangladesh cozah nih Myanmar tanzung palai cu voi 2 an auh cang. Rohingya ralzaam 800,000 hrawng hmanh atutiang nan lak hna lo lio ah atu ah miphun dang nan hun dawi hoi hna an ti,” tiah a chim.

“Bangladesh cozah cu Myanmar ralkap cungah a thinhung taktak, Bangladesh harnak a kan pek tuk a ti,” a ti. — The Irrawaddy

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.