Malaysia ah Chinmi an i that, 6 an tlaih hna

Tuni khuadei hlan 2:30am hrawngah Chinmi pawl cu an umnak inn chungah an i vel hna, pakhat an thah. Port Dickson peng, Lukut khua ah a si.

“Tunai ahkhan thawng a kan thanh. Mindat peng leimi an si. An min kan hngal ve rih lo. A thattu cu minung pakhat lawng a si ko nain an rianttuan hawi dihlak in an tlaih hna tiin thawng kan theih. Kan hlat cuahmah lio a si ve,” tiah Chin upa pakhat nih The Chin Express ah a chim.

“2:30 am hrawngah, inn dot 2nk ah ramdangmi an i vel tiin palek a kan chawnh,” tiah palek bawi Aidi Sham nih Malaysia media sinah a chim.

“4:30am ah lunghrinhmi Myanmar rammi [Chinmi] 6 kan tlaih hna. Rawldawr ah rian a ttuanmi lawngte an si. Kum 20 hrawng lawngte an si. Zaam an timh lio ah kan tlaih hna.”

“Inn dot 1nk kan check tikah, innkhan chungah an buainak nehnang pawl kan hmuh. Myanmar pa [Chinpa] ruak cu innka hram ah angki loin a rak um. A paw kehlei kam ah nam sawhnak hma an um.”

“Thah a tongmi pa cu a min ah Alliang ti lawng kan hngalh rih, Kum 20 hrawng a si,” tiah palek nih tuni ah thawng an thanh.

“33.5cm a saumi sa cannak namte pakhat cu coka ah kan hmuh, thi aa neh.”

Namte an tlaihmi media an piah hna lio

“A hmun ahhin tehte thilri an kaltakmi tlawmpal kan tlaih. Angki/bawngbi le zuu dur a lawngmi zong tehte caah kan tlaih. Rim hnimh thiam K9 uico fim kan auh.”

“4:30am hrawngah uico nih a kan hruainak, ahmun in 1km hrawng a hlatnak Kampung Kuala Lukut ah lunghrinhmi Myanmar pa [Chinpa] pakhat kan va tlaih. Mah hnu ah Myanmar mi [Chinmi] 5 cu pawngkam ah kan tlaih hna.”

“Zaam an rak i timh cuahmah lio asi. Angki le bawngbi bag khat in aa sanh dih cangmi zong an um.”

“Atutiang bia kan hal hna tikah, Myanmar ram in aa rak thok cangmi buainak ruangah a si.”

“Mah ruangah an i vel hna i pakhat an thah hi si. A hmun ah kan hmuhmi zuu dur lawng kha an dinmi si ttheo lai, zuu an rak ri men lai tiah kan zumh fawn.”

“Anmah lakah minung 1 lawng hi UNHCR card aa tlaihmi a si, adang pawl cu ACR (Alliance of Chin Refugee) card an i tlaih.”

“An dihlak in ni 7 chung palek sakhan ah kan hren hna lai. Mah chungah case kan tuah lai.”

“Mi a thatmi paoh cu thih dantatnak pek ve ding timi Lainawng Upadi Dal 302 in thil sining kan hlat cuahmah lio a si,” tiah palek bawi nih a chimchap.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.