Malaysia Ah Chin Pa Be Za Mi A Tlau
  • Mi nih an thah i tiva ah a ruak an hlonh
  • UNHCR nih November 10 ah a theih cang nain Chin ralzaam bu sinah thawng a thanh lo
  • An thah ning le a thattu theih a si lo
  • Tu zaanlei ah ruak an vui lai

Malaysia ah a ummi Chin tlangval Be Za Mi, kum 24 cu zahan ahkhan Mara upa pawl nih Shah Alam sizung ah aruak in an hmuh.

Be Za Mi cu November 8, 2018 zaanlei 5pm hrawng ah a umnak Kepong khua in Kotaraya ah a kal lio ah a tlau.

November 10 tiang inn a ttin ti lo caah a chungkhat an lungrethei tuk i Chin ralzaam bu pawl sinah thawng an thanh i bawmh an hal.

Lungrethei tukin an kawl peng nain an hmu kho ti lo. An lung dong tuk cang i tuah awk an hngalh ti lo caah nizaan ahkhan UNHCR zung ah bawmh an va hal.

UN nih, “Be Za Mi cu November 10 ahkhan palek nih a ruak in Shah Alam tiva ah an hmuh i atu hi Shah Alam sizung ah aruak cu an chiah ko…,” tiah a chimh hna.

November 10 ah palek nih a ruak an hmuh cangka in UNHCR sinah thawng an thanh colh ko nain UNHCR nih Chin ralzaam bu (ACR, CRC, FRO, tbk.) sinah thawng a thanh duh bak lo.

Atu zong hi Mara upa pawl nih UNHCR sinah bawmh va hal hna hlah sehlaw zei tik hmanh ah thawng a thanh hna lai lo tinak si.

A chungkhat pawl nih lungrethei tukin an kawl lai i zaan zong an i hngilh kho lai lo, rian zong an ttuan kho lai lo, ti hi UNHCR nih a theih tuk ko lai.

UNHCR nih Chinmi zei a kan rel lo ning hi ngaihchia ngai a si.

“Be Za Mi ruak cu tu zaanlei 1pm hrawngah kan lak lai i 2pm hrawngah Sungai Buloh thlanmual ah kan vui lai,” tiah Mara upa Salai Kam Cung Lian sin in kan theih.

Kotaraya ah a tlaumi zeitin dah Shah Alam tiva ah a ruak um khawh ning si? Aho te nih dah an fir i an thah? ti bantuk cu an hngal kho rih lo.

“Sibawi te nih, a ruak kan check lio ah zeihmanh hma a um lo. Nan lungthiang ko uh… a kan ti,” tiah Salai Kam Cung Lian nih a chim.

Be Za Mi cu Thantlang peng, Mara tlang i Le Lai khuami Pu Thy Che le Pi Si Nu hna i an fale 6 lakah 2nk a si. An unau hi nu 4 le pa 2 an si. Upa bik cu US ah a um i an chungkhar dang cu Laitlang ah an um hna.

Kum 2010 ah Malaysia ram a phan. 2013 ah UNHCR card a ngah.

Malaysia ram ah Chinmi thah kan ton hi a tam ngai cang. Ngaih a chia tuk hringhran.

Tantakmi chungkhar Pathian nih in umpi ko hna seh.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.