Malaysia ah Chinpa motor pah in sizung phan

“Lal Mawi cu motor nih a pah caah a kehlei ke a kiak i atu hi Hospital Kuala Lumpur (HKL) ah zohkhenh tu ngei lo in a um,” tiah Malaysia Chin Mino Bu (CYOM) nih The Chin Express ah a chim.

“Nizaan ahkhan CRC chairman he sizung ah kan va zoh. ‘Falam khuami ka si, zohkhenhtu hohmanh ka ngei lo, pastor 2 an ra i thla an ka campiak khawh in an ttin, bawmh ka herh ko’ tiah lungrawk ngai in a chim.”

“Puchong ah rian a ttuanmi si. August 23 kha rian aa dinh ni si i thil caw dingin Kuchai Lama ah a kal. Chun lailing i lam a tan lio ah motor nih a pah.”

“Motor nih a pah lio ahhin a lungfim lo. Sizung an kalpi lio zong aa thei lo. Sibawi nih an zoh hnu lawngah a lungfim.”

Malaysia ah Chinpa motor pah in sizung phan

“A kehlei ke a kiakmi cu a fak ngai. Thir an bunh i spring in an thlai. Tangka tam ngai a dih lai tiah sibawi nih an ti.”

“Malaysia ah amah lawngin ummi sikaw tangka bawmtu hohmanh a ngei lo.”

“2011 ah UNHCR card a rak ngahmi si nain, motor nih aa ka pah hnu cun ka lungfim lo i ka card umnak ka hngal ti lo, a ti,” tiah CYOM nih a chim.

Chinmi paoh nih tlawmte tal bawm cio usih

“Falam, Hakha, Kanpetlet, Mindat, Matu, ti um loin Chin a simi paoh nih RM5 te tal bawm cio hna usih. RM5 cu a dammi caah cun suimilaam 1 ah hmuh a si ko, nain a zawmi caah cun a sunglawi tuk,” tiah CYOM nih a chim.

“Minung pakhat nih tam kan bawmh khawh lo zongah tlawmte cio kan bawmhmi aa fonh ahcun kan thisa khat Lal Mawi caah santlai a si ko lai.”

“Kan theih bal lomi ramdangmi hmanh lamkam ah a ke kiakmi kan hmuh ahcun kan bawmh tawn cio, kan thisa bak a simi Chinpa hi tluk damlo le vansang in a um lio ah kan ti khawh tawk tein bawm cio hna usih.”

“Bawmhnak pek a duhmi paoh nih a tanglei langhtermi CYOM upa phone number ah pehtlaih khawh a si. Nan bawmhmi dihlak ttha tein report kan rak thanh colh lai. Hakha/Thantlang zong harnak a tongmi 2 an um, anmah kong cu hnu ah tling deuh in thawng kan thanh tthan te lai,” tiah CYOM nih a chim.

+60 1820 68240 – Saya Van Hngak Thang

+60 1836 272 99 – Hannah Sui

+60 1136 897 804 – Andrew Tum Tling

‭+60 182 188 461‬ – Lai Kam Thang

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.