Malaysia ah Salai Bawi Nun Thar nih a kan thih tak

Malaysia – Salai Bawi Nun Thar cu taksa damlonak in nizaan zingka 5am ah Muar Sizung ah a nunnak liam.

Kum 2007 ah Malaysia ah dawrnak kawl dingin a rak phan. Johor state i Muar khua ah rian a ttuan. Kan hnu zarh ahkhan a damlo caah Muar Sizung ah an kalpi nain ruah lo piin zahan zing ah a kan liam tak.

Pu Khaw Tin San (tleicia) le Pi Niam Par hna i an fapa Salai Bawi Nun Thar cu Sagaing ramtthen, Pyinkhonegyi khua ah a rak chuakmi a si.

Falam Ralzaam Bu (FRO) nih sizung, palek le adang a herhmi a tawlrel hnu ah Falam Christian Community (FCC) Chapel ah ruakvuinak service an tuah.

A ruak cu Muar khua in Fairy Park Klang ah chungkhat unau le FRO upa pawl nih an rung phurh.

Tuni September 19 chun 12pm ah FCC Chapel ah ruak vuinak service an tuah cang nain, UNHCR nih sizung ah ruak laknak ca a kuat colh lo ruangah atutiang ruak an thla kho rih lo.

FRO Chairman John Bawi nih, “voi dang bantukin UN nih ruak laknak ca an pe duh ti lo, fax in sizung ah an kuat. Ca cu UN nih sizung ah an rak kua lo. Ruakvuinak service a dih hnu i UN zung kan va kal hnu lawngah an kuat, Mipi thlan hmun an phan cang nain a ruak cu Muar in an ratpi kaa lawng a si rih. 6:30pm hrawng lawngah a phan lai. Tluang tein kan vui khawhnak hnga thlacam kan bawm cio ulaw,” a ti.

Khuasak le lu phum kan i timh lonak Malaysia ram ah Chinmi thong 2 (2,000) hrawng kan nunnak a liam cang. Ruah riangmang ah ngaih a chia hringhran.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2017 ah The Chin Express a dirh i ni fatin Chin thawngpang le vawlei cung thawngpang phunkip a ṭial.