Malaysia ah sunglawi takin Falam Civui an tuah lai

Kuala Lumpur – Falam Ralzaam Bu (FRO) i chungttuan phu (LCF KL, FCC, LCF Klang, LCF Penang, LCF Klang, MECF le GMCF) tawlrelnak in a ra laimi November 16 in 18 tiang, ni 3 chung ‘Falam Civui’ sunglawi taktakin an tuah lai.

Falam Civui nih aa tinh bikmi cu ‘Malaysia um Falam vialte hmun khatte ah Pathian thangtthat tti, Falam tefa Pathian bia ah an tthanchonak ding le hmun khat te ah hawikomhnak an ngeih khawhnak dingah a si’ tiah tlawreltu FRO nih thawng a thanh.

USA in thlarau le taksa lei ah kan pa CBANA nih civui caah tangka a dih ding acheu a bawmh hna pinah Kawlram lei in awttha Van Nei Man (Sayama Mante) zong civui tikah hlasa dingin a sawmpiak hna.

Civui tikah thawngttha chim dingin khuallian an sawmmi hna cu US ram in Rev. Sa Tin Lal (CBANA i Secreatary General) le Rev. Dr. Ci Lian Kap (CBANA Mission Director) an si.

“Malaysia um Falam tefa nan dihlak in thlarau, taksa le thinlung tthanchonak caah thazaang ra la cio dingin kan in sawm hna,” tiah FRO nih a ttial.

“Friday (Ningani) zaan in thok a si lai i Zarhteni le Zarhpini zaan tiang Pathian bia le thangtthatnak in hawikomhnak sunglawi taktak le nuam taktak in caan kan hmang tti hna lai. Atu in rian dinh ni (off day) rak la cio dingin kan in sawm hna.”

“Civui tuahnak ding hmun cu LCF Biakinn le Senthang Biakinn ah a si lai.”

“Pathian nih nan umnak le rianttuannak cio ah in kilvengin thluachuah in pe caamcin hraam hna seh,” tiah FRO nih a ti.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.