Malaysia Chin ralzaam kong ttuanvo la dingin Yangon ah 'Chin Supporting Committee' an dirh

Yangon – Malaysia le India um Chin ralzaam hna kong ttuan dingin Salai Aung Ling le a hawile pawl cu October 25 ah meeting an tuah i ‘Chin Supporting Committee’ bu an dirh.

November 3 ah Yangon um UNHCR zung rianttuan pawl he aa tong ding an rak si nain, UNHCR nih a thawn i zei tik dah an ton lai ti hngalh a si rih lo.

Chin ralzaam hna cu 2019 kum dongh ah hlawt dih dingin, UNHCR nih June 13 ah thawng a thanh.

Salai Aung Ling nih, “Chin ralzaam pawl nih Kawlram kir cu an duh rih lo caah an kirnak kong kan tuah lai lo. UNHCR cu Chin ralzaam kong hi zohfel tthan dingin kan forhfial lai,” a ti.

“Chin ralzaam kong ttuanvo la dingin Chin Supporting Committee zong kan dirh. Malaysia ah hnatlaknak kan rak ngeih cang bantukin rian kan ttuan lai.”

“Yangon ah UNHCR he kan i ton tikah zei kong dah a kan hal khawh timi pawl zong October 25 ah kan ceih i timhtuahnak kan ngei. Kanmah zong nih UNHCR rianttuan pawl cu, zei ruang dah Chinmi thengte lawng kirter na timh hna? tiah kan hal hna lai,” a ti.

“Malaysia kan kal lio ah, ICC (Independent Chin Communities) upa pawl he Chin ralzaam kong kan rak ceihmi 3 um;
  1. Ram thumnak lanh kong
  2. Malaysia ah phungning tein umnak kong le
  3. Kawlram kirnak kong hna an si.”

“Atu cu ram thumnak kal kong hi usa pek in kan ttuan lai. Cucaah, America le Australia um Chin bu pawl nih an umnak ram cozah cu Chin ralzaam usa pek dingin an forhfial lai.”

“Kawlram lei zongah, CHRO nih UNHCR cu a biachahnak zohfel tthan dingin a forhfial cuahmah lio a si. Chin party pawl le zatlang bu pawl nih Kawlram um UNHCR zung cu Chin ralzaam kong zohfel tthan dingin an forhfial cuahmah ve.”

“Cucaah, UNHCR nih thil 2 a tuahpiak tthan hna;

  1. Chin state thil sining cu UNHCR nih kan va zoh tthan lai, cun
  2. Khua chung thil sining kan hlat lai, an ti.”

“Khua chung thil sining an hlat tikah, Chin khuami pawl he biaruahnak zong an ngei te lai,” tiah Salai Aung Ling nih a chim. — Zalen

Salai Isaac Khen, Salai Aung Ling, Pu No Than Kap le an hawile pawl cu August 4 zong ahkhan Malaysia Chin ralzaam kirnak kong meeting an rak tuah.

August 4 an meeting lio ah atanglei bangin media sinah bia an rak chim.

Pu No Than Kap nih, “Chin state ah khuasami ca hmanh ah a har, an kir tikah cozah nih a bawmh hna lo ahcun innlo lo le tangka loin zeitin dah khua an sak lai. Kan lungrethei tuk, Rampi Cozah asiloah Chin state cozah tal nih tangka maw innlo maw, tangka cawih in maw a bawmh hna lo ahcun an har tuk lai,” tiah a chim.

“Malaysia um Chinmi hna kir le kir lo cu kanmah nih biakhiah khawh a si lo. Anmah tein biachahnak tuah a haumi si,” tiah Salai Isaac Khen nih a chim.

Salai Aung Ling nih, “Chin ralzaam kirnak caah cozah nih zeital khuakhan piakmi a ngei hna maw, a ngeih lo ahcun kanmah nih cozah sinah zeital kan hal piak kho hna lai maw, UNHCR hi tah zeital kan chim kho lai maw ti pawl kan ceih,” tiah a chim.

Video ah tling tein…

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.