Chin Refugee pawl hramhram in kan kirter hna lai lo

Myanmar ram a him lo ahcun ralzaam pawl hi hramhram in kan kirter hna lai lo, tiah Malaysia Ramdang Vuanci Datuk Seri Saifuddin Abdullah nih Chin ralzaam kong an hal lio ah a chim.

Myanmar ram ah thil sining kan va zoh lai i kirnak dingah a him lo ahcun, Malaysia cozah nih Chin ralzaam pawl hi hramhram in kan kirter hna lai lo, a ti.

“Kan tuahmi thil tampi cungah zawnruahnak kan ngei. Malaysia cu Kum 1951 Ralzaam Phungphai ah minsen kan thut lo nain a thumi bantukin kan um,” a ti.

Malaysia Ramdang Vuanci cu zahan chun kha Wisma Putra ah media pawl sin biachimnak a ngei. Mah lio cun, 2019 kum dongh ah UNHCR nih ralzaam in hlawt a timhmi Chin ralzaam kong an hal i atu bantukin a leh hna hi si.

“Chinmi pawl cu Malaysia ram ah kum 10 leng kan umter cang hna. Malaysia ram cu ralzaam um thai nak a si lo nain, Malaysia cozah nih dawtnak te he Myanmar Chin miphun cu him tein kan umter hna.”

“Cozah dirhmun in chim ahcun, kan ram ah minung tamtuk chiahnak thazaang kan ngeih lo pinah a timh zong kan i tim lo, nain minung cu kan dawi peng hlei hna lo,” a ti.

June 13 ah, UNHCR Malaysia nih “2019 kum dongh ah Chin ralzaam ka donghter lai, ka zohkhenh ti hna lai lo, hlawt an si cang lai,” tiin thawng a thanh.

“Chin state cu a him cang i Chinmi hna cu ralzaam zohkhenhnak an herh ti lo tiin UNHCR nih a ruah caah Chin ralzaam donghternak policy a tuah hi si, i Malaysia cozah cu UNHCR lam hruainak kan zul,” tiah Ramdang Vuanci nih a chim.

“ASEAN nih Myanmar ram ah Rohingya kong hlattu phu kan thlah lai, nain aa pehtlaimi adang kong zong an hlathlai chih ko lai ti ka zumh,” tiah Ramdang Vuanci nih Chinmi pawl kirnak kong he pehtlai in bia an halmi cu a leh hna.

Asia Nichuah Thlanglei Ram Pawl (ASEAN) i ramdang vianci pawl cu Singapore Ramdang Vuanci Vivian Balakrishnan nih a kan hruai lai i Rohingya pawl Rakhine state ah kirter hna dingin Myanmar ram ah thil sining kan va zoh lai, tiah Malaysia Ramdang Vuanci nih Nikhatni ahkhan a rak chim.

“Anmah lungtho tein kir an duh ahcun, kan rian cu ‘tluang tein le limhang ngei tein an kir i him tein, dai tein le tlamtling tein khua an va sak khawhnak ding tuaktan piak’ khi a si ko,” a ti.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. The Chin Express dirh a duh caah 2017 ah RSC ah rian dinhnak ca a ap i ni fatin Chin thawngpang le vawlei cung thawngpang phunkip a ṭial.