Malaysia: Tuluk Kum Thar dih sin tein rian thar ttuan a duhmi Chinmi caah rianttha taktak ttuan awk a um.

A ttha taktakmi Hotel (5 star) ah rianttun awk a um. Tlaihkhih le thlahlawh khongah lungretheih awk a um lo.

Cun, thiamnak hoih in rian phun i thim khawh a si. Mileng chawnbiatu, hotel thianhtu, manager bawmtu le rawl chuangtu tiin phun tampi ttuan awk a um.

Atu hotel rian hi atu ca lawng siloin, hmailei ram 3nk kal ah siseh, Kawlram kir tikah siseh, Malaysia na um chung zong ah siseh na phaknak ramkip ah hmam/ttuan khawh peng dingmi rian a si.

Alliance of Chin Refugees cu Mingway Group he rian an ttuantti i Mingway cu Malaysia Khirhfa pawl nih an dirhmi bu a si. Anmah nih hotel ah rianttuan a huammi caah a herhmi vialte an tlangtlak dih lai.

A hromthok ahcun, Chin miphun chungin UNHCR card aa tlaihmi lawng cohlan a si lai. Hnuah, buainak um lo ahcun Community card aa tlaihmi ca zong ah an ruah tthan te lai.

Hotel rianttuan tu dingah nu tam deuh an herh. Kum 18 in 35 kar an si lai. Nikhat ah sml 11 chung ttuan si lai. Thla khat ah ni 26 rianttuan si lai. Riansok na duh ahcun ACR zung ah voi 1 le Hotel ah voi 1 interview tuah a um lai.

Interview tuah tikah hal dingmi question pawl cu ACR zung ah hal khawh a si. Interview tuah hnu ah an in cohlan ahcun kum 2 ca hnatlaknak minthut si lai. Kum 2 hnu ah pehzulh duh ahcun kum 2 ca in minthut tthan si lai.

Thlahlawh cu RM1600 si lai. Rianttuan mipaoh CIMB bank account serpiak an si lai. A thla khatnak ahcun lahkhah chuah tikah cash/tangka in pek si lai nain avoi 2nk ahcun bank in thla fatin ni 7nk ni ah an in kuat lai.

Nikhat ah rawl 2 an in pek lai. Damlo le khawndennak ton sual cun i thlopnak tangka an in pek lai.

5 Star Hotel tam deuh cu MRT, LRT in kal khawh an si. Cucaah, inn pek si lai lo. Rian naa phuah tikah Hotel nih Certificate pek si lai.

Atu lio hi Genting Highlands, Jalan Sultan Ismail, Ampang le One World Hotel (hotel 3) nih rianttuantu an herh taktak liote a si.

Rianttuan a duhmi cu UNHCR card ngeimi si lai. A felmi si lai. A ngandammi si lai. Thiamnak le fimnak a uarmi si lai. Mirang le Malay holh tlawmte tel a thiammi si lai.

Hotel ah rianttuan ka huam bak ko a timi nih ACR – 0103345200 ah pehtlaih le min pek khawh a si. ACR zung khar hlan lawngah pehtlaih khawh si lai. Zaan sml 6 hnu cun chawnh khawh si lai lo.

Thawngthanhtu: ACR Malaysia

Azi cu Faiceu Journal website ah kum 1 leng thawnggpang a leh hnu ah The Chin Express (theihtlei.com, thechinexpress.com le thechinexpress.info) ah kum 3 chung thawngpang 2,000 leng a let/ṭial cang.