Malaysia – Chin ralzaam bawmtu bu ACR nih kum 2018 chungah Chinmi 1,000 leng Malaysia rammi boss sinah rian a hmuhpiak hna.

Chinmi 1,000 an sining cu ACR nih a kherhlai hnu ah kan i remh a herh ko tiah a ruahmi 4 cu atanglei bangin a langhter. Chinmi cu;’

1.Rian pakhat hi saupi kan ttuan kho/duh lo

Mi tampi cu lahkhah kan chuah a thaizing ah zei hmanh chim loin kan zaam beh. Rian aa phuakmi kan tam tuk. A tlamtling lomi le kan lungtling lomi um zongah kan boss sinah kan chim lo.

Mah duh salam in kan um. Cu ruangah a herh lomi harnak tam tuk a chuak. Zei bantuk harsatnak ngeih zongah ahlankan in boss chimh hnu ah i phuah ding a si. Mah lawngah boss te nih mithar an i kawlcia khawh ve lai.

2. Zuu kan ding tuk

Zuu a phunphun aza ti hngal lo le sikaan ngei loin kan ding hna. Zaan ah zuu tam tuk kan din ruangah a thaizing rianttuan kho lomi kan tam. Rian kan tlolh pinah nihlawh (tangka) zong kan sung.

Cheukhat cu boss te sin zongah thawng thanh lo, mah nawl piin aa dinmi hna kan um.

Kanmah le kanmah i dawt hi a biapit tuk bantukin, chungkhar le boss te zong kan zawnruah hna a hau. Cucu minung nun ning a si.

3. Thiamnak kan ngeih lo pinah cawn duhnak lungput zong kan ngei lo

Thiam lo cu theihthiam piak khawh a si nain cawn duhnak lungput zong ngeih lo cu apoi tukmi a si.

Rian ttuan hawi le boss te nih rian chimh a kan duh ko nain nautat kan hmang i mi nih chimh kan duh lo. Rian zong a thiam bantuk tein kan i umter nain kan thiam lomi a tam tuk.

Rian thiam lomi cu ttuan hawi sinah nautat lo tein cawn ding a si. Cun, a tlawmbik rawl-ei ti-dinnak Malay le Tuluk holh zong thiam i zuam ding a si.

4. Umtu tthutdir (ziaza) kan thiam lo

Rianttuannak ah zulhphung an tuahmi sikaan kan zul duh lo. Zulh dingin an chuahmi sikaan a si ti zong kan ruat lo. Kanmah nakin a sang deuhmi Supervisor te nih an tuahmi sikaan zulh le ngaih duhnak nun hrimhrim kan ngei lo.

Mah bantuk nunzia le lungput kan ngeih peng ahcun rianttuannak ah kan lahkhah le tlaihmi rian (position) kai a har tuk lai.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. The Chin Express dirh a duh caah 2017 ah RSC ah rian dinhnak ca a ap i ni fatin Chin thawngpang le vawlei cung thawngpang phunkip a ṭial.