Malaysia cozah nih Chin ralzaam khirhnak policy a zohfel tthan lai

Atu lio kan policy “Chin ralzaam pawl an chuahkehnak Myanmar ram ah khirh hi kan zohfel tthan lai” tiah Malaysia Ramdang Vuanci Saifuddin Abdullah nih tuni ah a chim.

“Ralzaam Hna Himnak” timi NGO bu dirhtu Malaysia Tuluk nu Heidy Quah nih “Chin ralzaam hna hi Malaysia ah tu hnu kum tlawmpal umter rih ko hna uh” tiin a nawl hnu ah Ramdang Vuanci nih atu bantukin a leh hi si.

February 14 ah Malaysia Mino Bu pawl le cozah cu ramdang policy kong biaruahnak meeting an ngei hna.

Mah lio ah Heidy Quah nih, “Chin state ah a cang cuahmahmi ral kong reports zong kan in piah khawh. Khirh kan timh hna ruangah Chin ralzaam pawl an lungdong tuk i amah tein aa thatmi zong an karh thluahmah.

“Thaizing zong hi Chin Miphun Ni ah Chin ralzaam hna tuarnak kong chimphuannak kan ngei lai… Chin ralzaam hna hi Malaysia ah kum tlawmpal umter rih ko hna uh,” tiah a nawl.


Heidy Quah

Meeting a dih hnu ah, media sinah thawngthanhnak an tuah. Pu Saifuddin nih, “Chin ralzaam kong ahcun UNHCR nih a timi paoh zulh ding hi cozah nih kan i timhmi a si, nain mah kongah ruahnak cheuhmi tete cu lunglawm tein kan cohlan ko,” tiah a chim.

“Malaysia cu UN Ralzaam Hnatlaknak ah minsen a thut lomi kan si ko nain, ralzaam hna an ram i an kir tikah an him khawhnak hnga cozah nih kan si khawh chungin kan ttuanrel ve ko lai.”

“A zeizong tein ttuanvo kan lak lai tinak cu a si lo nain, Malaysia ram a rung phan cangmi paoh cu hramhram le hnekchom si loin mah lungtho tein kir a duhmi lawng an kirnak hnga, an himnak hnga le limhang ngei tein an kir khawhnak hnga caah i teltum ve kan duh,” tiah a chim.

Chin ralzaam hna cu UNHCR nih 2019 Dec 31 ah hlawt dih an si cang lai, tiah thawng a thanh i 2018 August 1 thokin hlawt hram a thok thluahmah cang.

Chin ralzaam bu pawl nih an chim ning ahcun Malaysia ram chungah Chinmi 39,000 kan um. Mah chungah UNHCR cazin ah ralzaam le ralzaam soktu minung 31,150 kan si nain UNHCR nih hlawt a thok hnu cun kan zor thluahmah i kum 2018 dongh ahcun 26,180 lawng kan taang cang.

UNHCR cazin ah kan zornak aruang bik cu a kan hlawt/reject thluahmah ruangah a si.

Thaizing hi Chin Miphun Ni tuahnak hmun ah zingka 11am in 12pm tiang ACR Coordinator James Bawi Thang Bik, CRC, Heidy Quah le Maria Chin nih Chin ralzaam kong Malaysia media sinah chimrelnak an tuah lai.

Courtesy of James Bawi Thang Bik (ACR Coordinator)

The Chin Express nawl loin copy hlah.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.