Kuala Lumpur – Cozah nih ralzaam pawl rianṭuan, sianginn kai le cozah sizung ah man fawi tein thlopnak nawl pek kong a ruah liopi si, tiah Ramleng Vuanci Saifuddin Abdullah nih nizaan ah a chim.

Nizaan kha Klang ah a ummi Rohingya Ralzaam Sianginn ah a len hnu ah media sinah thawngthanhnak a tuah i mah lio ah atu bantukin a chim hi si.

“Ralzaam pawl rianttuan, sianginn kai le cozah sizung ah man fawi tein thlopnak nawl pek kong an chimmi pawl hi cozah nih a ngaih liopi si ko tiin ka ruah.

“Abik in, Fimcawnnak le Ngandamnak Vuanci Zung nih mah kong hi an ruah lio a si.

“Policy ngaingai cu an tuah rih lo nain, mah vuanci zung pahnih hi cu Rohingya ralzaam bawm dingin biatak tein an i zuam.

“Minung Thazaang Vuanci Zung (Rian Tuannak Vuanci Zung) zong nih ralzaam pawl Malaysia ah rianttuannak nawl pek kong a rak ruah len, hneksaknak ah tiin Rohingya ralzaam tlawmpal zong rianttuannak nawl a rak pek hna i company nih rian an pek cang hna.

“Cozah nih ttha tein policy kan tuah ta rih a hau, ramchung company pawl nih ralzaam cungah dawtnak an ngeihmi hi kan i lawmh tuk awk a si,” tiah a chimchap.

Najib acozah lio 2017 ah, Cozah Lutlai Changtu le Ramchung Vuanci a rak simi Ahmad Zahid Hamidi nih, “hneksaknak caah tiin Rohingya ralzaam tlawmpal cu cintlaknak lo le sehzung pawl ah rian tuannak nawl kan pek hna lai,” a rak ti.

UNHCR card aa tlaihmi Rohingya ralzaam pawl lawng rian tuannak nawl kan pek rih hna lai. Ralzaam dang cu onh an si rih lai lo, a rak ti.

Atu lio Ramleng Vuanci Pu Saifuddin nih, “liamcia cozah nih Rohingya tlawmpal rian tuannak nawl a pekmi hna phichuak zong kha zohchih in ralzaam pawl rian tuannak nawl pek kong cu bia kan khiahte lai,” tiah nizaan ah a chim.

“Ralzaam pawl cu anmah le umnak pawng cio ah rian tuannak nawl pe hna usih law a ttha hnga maw ti zong kan ruahte lai,” tiah a chimchap.

Pu Saifuddin cu February 14 ah ‘Ralzaam Hna Himnak’ timi NGo dirhtu Malaysia Tuluk nu Heidy Quah nih “Chin ralzaam hna hi UNHCR nih a hlawt hna zongah Malaysia ah kum tlawmpal umnak nawl pe rih ko hna uh…” tiin a nawl.

Pu Saifuddin nih, “Chin ralzaam pawl cu an chuahkehnak Myanmar ram ah khirh dih ding timi atu lio kan policy cu kan zoh tthan lai…,” tiah a leh. [Mah kong cu ka hmet law relchap]

Malaysia ram ah Chinmi 30,000 leng kan um. UNHCR nih 2019 dongh ah hlawt dih dingin bia a khiah cang caah tu kum dongh hlan ah Kawlram kir dih, a kir duh lomi cu 2020 January 1 in Malaysia palek le lahwahkah nih tlaih in thongthlak hnu ah khirh dih ding kan si. Mah hi hmet law UNHCR le Malaysia cozah nawlnak ca kua ve.

Cucaah, Malaysia ah Chinmi phungning tein rianttuan, sianginn kai le man fawi tein cozah sizung ah i thlopnak nawl kan ngah ahcun a ttha tuk lai. Kan ngahte hnga maw? Na ruahning comment…

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.