Kum 71nk Chin Miphun Ni (CMN) cu 2019 February 15 ah sunglawi taktak in kan tuah lai, tiah puai tuahtu upa nih tuni ah thawng an thanh cang.

Liamcia caan ahcun Chin Miphun Ni taktak February 20 ah kan tuah peng ko nain tu kum cu puai tuahnak inn a lawn lo caah February 15 ah kan timhnak a si, an ti.

Puai tuahnak ding hmun cu ni kum tuahnak Chinese Assembly Hall tthiam ah a si lai.

“Ramkip um Chin hruaitu upa pawl nih telpi dingin khua kan khan cuahmah lio a si. Malaysia um Chinmi vialte zong Kan Miphun Ni lawm ve dingin timhcia tein nan rak um cio naklai thawngthanh le forhfial kan in duh hna,” tiah Chin Miphun Ni tuahtu upa nih an thanh.

Chin hruaitu aho dah a ra te lai, Chin awttha aho dah sawm a si te lai, tbk., pawl cu bia an khiak rih lo.

70nk Chin Miphun Ni – 2018, Malaysia

Malaysia ah a donghnak bik Chin Miphun Ni?

Tutan cu Malaysia ah a donghnak bik Chin Miphun Ni kan lawmh a si cang men lai.

UNHCR nih Chin miphun cu 2019 December 31 tiang lawng card a kan pek cang i card a thih in cun a kan hlawt dih cang lai.

2020 January 1 in cun Myanmar ram ah rianrang in kir thluahmah kan hau cang hna lai, kir lo ahcun phungninglo in Malaysia ah um kan hauh lai caah tlaih le thongthlak kan tong kho.

2020 February tik cu Malaysia ah Chin Miphun Ni tuah khawh lo zong kan fawi ngai cang. Va tuah kho hmanh usih law UNHCR card lo lawngte kan si lai caah a chuak ngam lomi kan tam tuk cang lai.

Cucaah, Avoi 71nk Chin Miphun Ni cu Malaysia um Chinmi kip nih sunglawi taktak in lawm cio hna usih.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2017 ah The Chin Express a dirh i ni fatin Chin thawngpang le vawlei cung thawngpang phunkip a ṭial.