Malaysia le India Chin ralzaam lak dih dingin US cozah sin ah an hal

Malaysia le India ah a taang rihmi Chin ralzaam vialte US cozah nih lak dih dingin Burmese American Community Institute (BACI) nih US Senator Todd Young Office ah an hal, tiah thawng kan theih.

Zahan September 28 ah Washington DC ah BACI Board Chairman Dr. Ro Ding, Vice Chairman Pu San Hlei Thang, Project Director Salai Andrew Laitha le Executive Director Elaisa Vahnie nih Senator Office an ton i acunglei bangin an nawl hi si.

“Refugee card a ngei cangmi Chin ralzaam 7,000 leng an um, US cozah nih la dih ko hna uh, an caah attha deuhmi aphi dang um rih lo kan ti,” tiah Salai Elaisa Vahnie nih a chim.

Malaysia le India Chin ralzaam lak dih dingin US cozah sin ah an hal

“Asylum seeker cazin ah khumhmi Chin ralzaam 23,000 hrawng an um i Community card lawng a ngeimi 25,000 hrawng an um. An dihlak in refugee lawngte an si, kan ti.”

“White House le Ramdang Vuanci zung he zong kan i tong colh tthan, kan halmi a tlamtlin khawhnak dingah khuakhang tti dingin kan hna a tla,” tiah Salai Elaisa nih a chimchap.

September 21 zongah Chin Community of Indiana (CCI) le Chin Refugee Advocacy nih US Ramdang Vuanci Zung tangum Ralzaam Latu Zung (BPRM) an rak ton i Chin ralzaam lak dih dingin an rak nawl.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.