Malaysia le India um Chin ralzaam pawl Kawlram kirter awk an ttha rih lo

Joseph Kung Za Hmung hruaimi NGO CAD nih September 13 ah ‘Chin ralzaam kir bawmh ding’ in thawng a thanhmi kong he pehtlai in, Chin Nuhrin Covo Bu (CHRO) rianttuan Salai Sang Hnin Lian nih, “biakamhnak zeihmanh a um lo buin Chin ralzaam hna Kawlram ah kirter awk an ttha rih lo,” tiah a chim.

“UNHCR nih Chin ralzaam hna Kawlram kir dingin thawng a thanhmi hi a tuan tuk rih, tiin bu kip nih thla 2 chungah cathluan 12 kan chuah. Mah hnu cun UNHCR Delhi nih Chin ralzaam kong biachahnak a rak tuahmi zong a ngol chung.”

“UN hmanh nih cutin a ngol chung lio ah, Kawlram lei in zeihmanh biakamhmi a um lo buin ra kir ko u ti phunphai cu a um awk si lo. Ra kir tak hna sehlaw mah bu nih cun zei tiang dah a bawmh khawh hna lai? Kawlram cozah nih ta a herhmi chungkhar cazin le hmatpungttin a tuahpiak dih hna lai maw? A kirmi pawl thleidan an tong lai lo tiah bia an kamh kho hna lai maw? Hi bantuk pakhat hmanh a um lo buin kirnak khuakhan cu a tuan tuk rih,” tiah CHRO i Biaknak Zalennak Zung lutlai Salai Sang Hnin Lian nih a chim.

CAD nih thawng a thanhmi ca chungah, “UNHCR nih thawng a thanh hnu ah a hmailei kongah lungrethei le lungzormi Malaysia phan Chin ralzaam hna, lungdamnak le nun himnak caah Kawlram kir a duhmi cu a dikmi catlap in nan kir khawhnak hnga 2019 thokin kan in bawmh hna lai,” tiah a ttial.

Mah kong he pehtlai in CAD lutlai Joseph Kung Za Hmung nih, “Chin ralzaam hna chung ahhin amah lungtho tein kir a duhmi an um, nain tangka a ngei lo i kirnak caah a herhmi catlap aa tuah thiam lo ti bantuk bawmh a herhmi pawl cu kanmah zung nih 2019 thokin kan in bawmh hna lai tiah thawng kan thanhmi si,” tiah a chim.

“Thawng kan thanh hnawhchan cu, UNHCR nih 2020 ah Kawlram nan kir cang lai tiin thawng a thanh cang caah Chin ralzaam cheukhat cu an lungrawk, acheu cu UN card an ngeih lo caah thong a tlami an um, acheu zuu nih a leemmi pawl cu hri awk in aa thatmi zong an um, mah ruang cun bawmh hna dingin bia kan khiahmi si.”

“Kirnak caah a herhmi catlap kan tuahpiak hna lai i an khua tiang kirnak lawnglawng kan bawmh hna lai. Chin state ahcun rian a har tuk caah rian kong cu kan bawm kho hna lai lo,” tiah a chimchap.

Joseph Kung Za Hmung bu CAD nih September 13 ah thawngthanhnak a tuahmi kong he pehtlai in a ra laimi October thla chungah Yangon ah thawngfianhnak tuah an i tim, tiah theih a si.

Salai Sang Hnin Lian nih, “a biapi bikmi cu – Myanmar cozah nih ka rammi ralzaam an um timi hi a cohlang lo, a kirmi ralzaam ca zongah cozah nih caan saupi ca biakamhmi zeihmanh a um lo, ralzaam hna nih kan kir lai an ti sual ahcun Myanmar cozah, UNHCR le Malaysia cozah an lungtlin hnu lawngah an kirnak khuakhan piak hna ding si, nain Myanmar cozah le UNHCR nih mah kong hi an tuah kho rih lo, cucaah zeihmanh biakamhmi a um lo buin kirnak khuakhan cu a caan cu rih lo tiin ka ruah,” tiah a chim. — Chin World

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.