Malaysia cozah nih Chin ralzaam 40,000 Myanmar ram ah khirh a timh hna caah mino tete i an lungthlitum a rawk dih cang, tiah Malaysia media nih tuni ah an ttial.

Malaysia ram ah Chinmi 40,000 hrawng kan um. Mah chungah 31,000 hrawng hi UNHCR card a ngahmi kan si.

Nain, 2018 June thla ah UNHCR nih Chin ralzaam donghter/hlawt dingin bia a khiah i August 1 thok in a kan hlawt thluahmah caah UNHCR cazin ah Chinmi 26,000 lawng kan taang cang.

James Bawi Thang Bik – ACR Coordinator

Chin Ralzaam Bawmhnak Bu (ACR) Coordinator James Bawi Thang Bik nih, “hi vialte Chin ralzaam hi rak kir ko hna seh, hmatpungttin ka pek dih ko hna lai, tiin atutiang Myanmar cozah nih biakamhnak a um rih lo,” tiah a chim.

“Myanmar ram ahcun hmatpungttin loin zeihmanh tuah khawh a si lo.”

“Ralzaam tampi cu Malaysia ah a tthanglianmi an si hna. Cheukhat cu Malaysia ah a chuakmi an si hna caah Malaysia pin cu khuazei hmanh an theihmi um lo,” tiah a chimchap.

Tu kum dongh, 2020 January 1 cun atu Chin ralzaam pawl nih an i tlaihmi UNHCR card hi a thi dih cang lai. UNHCR nih a thlenpiak ti hna lai lo caah phungninglo in Malaysia ah um an si lai.

Mah tikah Malaysia palek le lahwahkah nih tlaih, ti hal le rawl ttam in a thlathla thongthlak hnu ah Myanmar ram ah kuat an si te lai.

Malaysia nih ramdangmi a tlaih hna tikah an ram ah a kua colh hna lo. Myanmar Tanzung (an ram tanzung) ah passport halpiak le a herhmi tete tuahnak caah a thlathla in a rau tawn. Mah chung vialte cu thonginn chungah ti hal le rawl ttam in hren an si.

Chin ralzaam 15,000 hrawng cu, Malaysia cozah nih ralzaam pawl an umnak hngalh khawhnak caah a tuahmi “GPS a ngahmi chipset rawnmi MyRC card (Tracking Refugees Information System = TRIS ti zong auhmi)” an i tuah hna i an inn address le phone number zong Ramchung Vuanci Zung ah an pek dih fawn caah, UNHCR nih a hlawt hna hnu ahcun Malaysia palek le lahwahkah nih an inn cio ah an va tlaih khawh hna lai – Malaysia cozah nih an ram ah umnak nawl a kan pek ahcun phun dang, nain nihin tiang an biachim ning ahcun tlaih, thongthlak in kuat dih ding ti a si peng.

UNHCR nih Chin ralzaam hlawt dingin bia a khiahmi le a hlawt cuahmahmi hna hi ngolter dingin, Chin ralzaam bu, CHRO, US le Australia Chin upa pawl, le Chinmi pumpak tampi an i zuam cuahmah lio a si. A tlamtlinnak hnga thlacam in bawm cio hna usih.

A tlamtlin lo i mahti ningin a si thai ahcun, Malaysia um Chinmi 40,000 hrawng hi 2020 January 1 in cun Malaysia ah tlaih in rawl ttam le ti hal in a thlathla thongthlak hnu ah Kawlram kuat dih an si cang lai.

Malaysia cozah nih Chin ralzaam hi UNHCR nih a hlawt hna ahcun kan tlaih hna lai i kan kuat dih hna lai a ti [Ka hmet law relchap]

The Chin Express nawl loin copy hlah

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. The Chin Express dirh a duh caah 2017 ah RSC ah rian dinhnak ca a ap i ni fatin Chin thawngpang le vawlei cung thawngpang phunkip a ṭial.