Kuala Lumpur – Lahwahkah nih hmun 2 ah tlaihkhihnak an tuah i phungninglo ramdangmi 200 leng an tlaih hna. 

“Avoi 1nk cu Cyberjaya sang i ungti cinnak lo ah tlaihkhihnak kan tuah i phungninglo ramdangmi 185 kan tlaih hna,” tiah Lahwahkah bawizik Mustafar Ali nih a chim.

“185 hna cu Indonesia le China rammi an si.”

“Mahka hmun ahcun ramdangmi 235 kan check hna hnu ah pa 92 le nu 93 kan tlaih hna. Nu 93 lakah liamcia ni 2 ah an hrinmi bawhte nute pakhat zong aa tel.”

“Kan tlaihmi hna cu an dihlak in lahwahkah upadi a buarmi lawngte an si. Phungninglo in Malaysia ah a rami le visa a thih hnu tiang a ummi an si hna.”

“Tlaihkhihnak kan tuah lio ah Ramchung Vuanci Changtu Datuk Mohd Azis Jamman nih a kan zulh.”

“Avoi 2nk tlaihkhihnak cu Jalan Pudu um hotel pakhat ah kan tuah. Mah hotel cu Indonesia le Thailand nu pawl hlawhhlang ttuannak caah an hman.”

“Sungtthuh nih thil sining an ngiat dih hnu ah, liamcia thla tlawmpal in hlawhhlang ttuannak caah an hman ti kan hngalh.”

“Nu 18 kan tlaih hna. Kum 20 in 30 karlak lawngte an si i Indonesia le Thailand nu pawl an si. Hotel security rian a ttuanmi Bangladesh pa zong kan tlaih.”

“Mah hotel hi liamcia caan zong ah kan rak luhhnawh tawn nain hlawhhlang an rak um lo. Hotel chungah a ummi thilri tlawmpal zong kan tlaih hna. Namtong pakhat zong kan tlaih.”

“Kan tlaihmi hna cu an dihlak in Bukit Jalil lahwahkah thong ah kan chiah hna. An sualnak upadi he aa tlakmi in tazacuai le a theipar zunter an si te lai,” tiah Lahwahkah bawi nih a chim.

“Kan ram ah ngandamnak caah a ttha lomi hlawhhlang ttuan le phungninglo ramdangmi pawl cu a si khawh chungin cozah nih kan tlaih peng hna lai,” tiah Ramchung Vuanci Changtu nih a chim ve.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.