Malaysia thonginn ah Kawlram ngakchia 400 deng an um

Kuala Lumpur – Malaysia ram pumpi Lahwahkah thonginn 13 ah ramdang ngakchia 1,000 leng an um, tiah Lahwahkah zung nih a chim.

A tambik cu Indonesia ngakchia (474) an si i a changtu ah Myanmar ngakchia (380) an si. Adang hna cu;

  • Thailand (139),
  • Rohingya (136)
  • Cambodia, Vietnam, Philippines, Bangladesh le China fonh (118) hna an si.

Lahwahkah nih tlaihkhihnak (oprasi) kan tuah lio ah ngakchia hna hi an nulepa he an um caah kan tlaihchihmi hna an si, tiah Lahwahkah bawizik changtu Eadie Nor Faizal nih a chim.

“An nulepa kan tlaih hna tikah, zohkhenhtu rep ngei loin an fale kaltak awk an ttha lo. Tuah awk hngalh loin kan tlaih chihmi hna an si,” tiah nizaan i Malaysia Sihni Bu (Bar Council) nih Ralzaam Zohkhenhnak Upadi Kong Khuakhannak an tuah lio ah Lahwahkah bawi changtu nih a chim.

Lahwahkah thonginn ahhin ngakchia caah adang tein tuahmi khaan a um lo caah a si khawh chungin ngakchia tlaih lo kan i zuam, a ti.

Lahwahkah thong = ramdangmi chiahnak thong (hika ahcun ramdangmi lawngte an chiah hna i a ran khawh chungin an ram cio ah an kuat hna, sau deuh an um ahcun Malaysia cozah tangka a dih tuk caah…)

Atu lio ahhin, Malaysia ram pumpi lahwahkah thonginn dihlak ah thongtla ramdangmi le ralzaam 9,200 leng an um.

Atu hi Lahwahkah thonginn ah ramdangmi an i tlum ti lo, an i teet tuk cang, tiah Lahwahkah bawi changtu nih a chim.

Ramdangmi thongtla minung pakhat zohkhenhnak (rawl, ti le mei, le adangdang) caah hin ni 1 ah RM80 hrawng a dih – Ramdangmi thongtla 9,200 caah ni fatin cozah tangka RM736,000 hrawng peng a dih. Thla fatin RM22 million peng a dih.

Mah bu hmanh cun lahwahkah thonginn hi a chiakha tuk i minung umnak caah cun a si kho deuh hrim lo, tiah lahwahkah bawi changtu nih pheh lo tein a chim. — The Star

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.