Malaysia um Chin ralzaam hna an hmailei lam a mui

Malaysia – Chin ralzaam sianginn ah a kaimi Chin ngakchia pawl cu kum 6, kum 7 hrawng tete Mirang holh in an i chawn hna i an thiam taktak. Malaysia University tampi in degree a ngahmi pawl hmanh mah tlukin an thiam lai ti ka zumlo, tiah China cozah media CGTN nih nizaan ah a ttial.

Nain, UNHCR nih “2019 Dec 31 hnu cun Chinmi pawl cu ralzaam in ka hlawt cang hna lai. Chin state cu a dai in a him cang caah ralzaam zohkhenhnak an herh ti lo,” a ti.

Asinain, Chin ralzaam pawl cu Myanmar ram ah kir an i tim lo. Ram thumnak kal ding lawngte an i ruahchan peng ko.

Ram thumnak kal ding balte cu a har taktak cang. UNHCR cazin ah ralzaam le ralzaam-soktu 160,000 an um. Mah chungah tu kum ah minung thong 2 hrawng lawng ram thumnak an kal kho – Mah chungah Chinmi lebang cu tlawmte lawng an i tel.

UNHCR Malaysia lutlai Richard Towle nih, “atu cu ralzaam a lami ram an tlawm tuk hringhran cang,” a ti.

“A umnak hmun ah um rih awk a ttha hrimhrim lomi minung lawnglawng usa kan pek hna hau cang,” a ti.

October thla dongh tiang ahkhan UNHCR cazin ah Chin ralzaam le ralzaam-soktu 27,860 an um.

Mung Khat, Chin Ralzaam i Bawmhnak (ACR) chairman nih, “Myanmar ram ah buainak a um peng rih ko. Remdaih Khuakhannak an tuahmi zong a tluang lo. Ralkap nih uknak hrawmh zong a um lo caah Myanmar ram, Chin state hmanh hi a him cang kan ti kho lo,” a ti.

“UNHCR nih Chin ralzaam donghter dingin thawng a thanhmi nih Chin ralzaam vialte lungrethei in a kan chiah dih.”

“Kan caah thawngpang chia taktak a si, Malaysia ah lungrethei in kan um lio ah mah bantuk thawngpang aa hung chap cu kan thla-lau dih. Naite ah Chin ralzaam 3 zong anmah tein an i that cang,” a ti.

Richard Towle cu a lung tthul duh hlei lo, “Chinmi cheukhat cu an case hoih in ralzaam ah cohlan thaimi zong an um ko men lai, nain Chinmi zapi cu hlawt an si ko lai,” a ti tthiam ko.

“Chin ralzaam hna caah thim awk 3 lawng a um.

  1. Myanmar ram ah kir,
  2. Ram thumnak kal (UNHCR nih hlawt hnu ahcun a pit) le
  3. Malaysia ah rianttuan lawng hi si ko,” tiah Richard Towle nih a chim.

Dr Mahathir party PH nih thimnak an luh lio ah “kanmah na kan vote ahcun ralzaam pawl phungning tein rianttuannak nawl kan pek hna lai” an rak ti nain, atu hi cozah an tlaihnak thla 6 a si cang i zei cukha an ti rih lo.

“Chin ralzaam hna an himnak le damnak kong, a bikin chungkhar le ngakchia he a ummi pawl cu ttha tein kan zoh peng ko hna lai. Nain, ralzaam zohkhenhnak hi zungzal ca a si lo ti hi Chinmi hna nih an i fian a herh,” tiah Richard Towle nih a chim.

Asinain, Chin ralzaam bu pawl nih ‘zei tik hmanh ah kan lung dong lai lo’ an ti.

Chin ralzaam hna ra kir ko hna seh tiin le a zaammi pawl ka ngaihthiam hna tiin Myanmar cozah nih zapi theih in thawngthanhnak zong a tuah rih lo, an ti.

“Ralzaam sinak sungh lai cu kan celh lo caah fak piin doh kan i zuam peng ko. Ram thumnak cozah zong kan ton hna lai, policy lei zong in kan doh lai,” an ti.

Chin ralzaam hna cu UNHCR nih a hlawt hna hnu ahcun, Malaysia cozah nih “phungninglo ramdangmi” hmuh in a hmuh ve cang hna lai i tlaih le thongthlak in Myanmar ram ah kuat an tong te lai.

Richard Towle nih, “Chin ralzaam pawl cu an caah ramdang cozah le NGO i ruaih an thiam ngai i media lung zong an lak ngai. Nain, mi va lemsoi nakin kanmah UNHCR he hin a dikmi lam kawl tti hna seh ti ka duh,” a ti.

Chin sianginn ah kir tthan usih law, Chin ngakchia tete nih anmah tein sianginn khaan an phiah, hnawm an hlonh i umkheng an ttawl. Mirang holh an chimh hna pinah nunzia dawh an cawnpiak hna. Chin ralzaam a la duhmi ram caah cun an tthahnem ngai lai, lungawttawm in a ummi Malaysia zong nih dornak nawl a pek hna ahcun an tthahnem ngai lai.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. The Chin Express dirh a duh caah 2017 ah RSC ah rian dinhnak ca a ap i ni fatin Chin thawngpang le vawlei cung thawngpang phunkip a ṭial.