Malaysia um Chinpa 'Joel' a tlau

Hakha peng, Vanha khuami tlangval Joel cu a tlaunak ni 5 a si cang, a hawile nih ni 5 chung rianttuan loin an kawl cang nain an hmu kho lo.

Joel cu kum 30 hrawng a si. 2009 ah Malaysia ram a phan. UNHCR card a ngei lo.

“Johor state i Johor Bahru khua ah rian kan ttuan. October 30 ahkhan thil caw dingin Jalan Baja lei ah kan kal hna. Joel he minung 4 kan si,” tiah a hawipa nih The Chin Express ah a chim.

“Joel nih ka paw ttam, rawl ka caw ta lai a ti, taxi chungin kan in hngah lai kan ti. Joel cu a rung kir ti lo. Ramtang lei ah a kalmi kan hmuh i kan va dawi nain khuazei a kal kan hngal ti lo.”

Joel

“Kan kawl lengmang nain kan hmu kho ti lo. Phone zong aa ken lo.”

“A tlau cangka in tuzaan tiang hi rian ttuan huaha loin kan kawl lengmang nain kan hmu kho ti lo. Kawlnak zong kan hngal ti lo. Kan lungdong tuk cang,” tiah zahan zaaan 12am ah a hawipa nih a chim.

“Palek nih an tlaih maw si asiloah kirnak hngal ti loin a tlau dah si ti zong kan hngal lo,” a ti.

Kuala Lumpur um Vanha khua upa pawl nih kawlnak kong khua an khan cuahmah liopi a si. Tuan ah an hmuh khawhnak hnga thlacam bawm cio hna usih.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.