Malaysia: UNHCR nih Chin ralzaam 26,000 a hlawt hna ahcun Myanmar ah kan kuat dih hna lai

Kuala Lumpur – Malaysia um Chin ralzaam 26,000 kong ahhin cun cozah nih UNHCR biakhiahmi kan zulh ve ko lai (UNHCR nih a hlawt hna ahcun kan tlaih hna lai i thongthlak in Myanmar ram ah kuat an si ko lai), tiah Malaysia cozah nih a chim.

“Malaysia cu 1951 le 1967 Ralzaam Upadi a cohlang lomi ram kan si caah Ralzaam Upadi a zul lo kho kan si.

“Media nih an ttialmi ‘UNHCR nih Chin ralzaam 26,000 hlawt dingin bia a khiah’ timi hi UNHCR nih official in cozah sinah thawng a kan thanh rih lo. Cucaah, UNHCR nih official tein thawng a kan thanh hlan paoh cu cozah nih Chin ralzaam kong thawngthanh len hi kan duh rih lo.

“Malaysia Lahwahkah Upadi 1959 nih fiang tein a langhter bangin, passport a ngei lomi paoh cu, UNHCR card aa tlaihmi pawl hmanh hi kan ram upadi mit ahcun ‘phungninglo ramdangmi’ an si, cucaah tlaih in an chuahkehnak ram ah kuat dih ding an si.

“Chinmi hna nih Myanmar ram an chuahtaknak aruang hi Myanmar ram i miphun dang pawl he aa lo lo. Chin miphun cu Myanmar rammi (citizen/hmat-pungttin) tal an ngah [Rohingya cu an ngah lo].

“Cucaah, Chin ralzaam pawl caah cun Chin state a daih ahcun kir a fawi deuh. UNHCR nih report cathluan a kan pekmi zoh tikah, Chin state cu a dai deuh thluahmah cang ti asi, mah ruangah an ram ah kir in nunnak thar va thok khawh an si.

“Malaysia ah rat tthan an duh ahcun, passport le work permit in rat khawh peng a si ko.

“Kan ram chung ralzaam hna cu an sining hoih cio in kan zohkhenh hna [Rohingya usa kan pek hna] ti hi Malaysia cozah nih fiang tein chim tthan kan duh.

“Zei bantuk ralzaam hmanh Malaysia ah zungzal umnak nawl pek kan tim hna lo. An zaam takmi a daih cangka in an ram cio ah an kir hrimhrim a hau,” tiah Malaysia cozah in ralzaam kong ttuanvo latu zung National Security Council (NSC) nih cathluan a chuah.

The Chin Express nawl loin copy hlah

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2017 ah The Chin Express a dirh i ni fatin Chin thawngpang le vawlei cung thawngpang phunkip a ṭial.