Matupi ah Myanmar Ralkap nih lengchuah an kham hna

Matupi khuapi chung sang 4 le Matupi peng khuate 2 ah zahan zaanlei 5pm in tu zingka 7am tiang leng chuah lo dingin Myanmar Ralkap nih nawl a chuah (curfew a tuah).

Matupi penguk bawi U To To Tun nih, “Nga Leng le Pha Neng khuate, le Matupi khua chung sang 4 i hruaitu pawl cu ralkap bawi nih meeting a kan auh i tuzaan 5pm in February 7 zingka 7am tiang hohmanh inn leng chuak hna hlah seh tiin nawl a kan chuahter,” tiah February 6 ah CHRO sinah a chim.

February 6 zaan 7pm hrawngah Sa Bong sanguk zung nih loudspeaker in thawng a thanh. Zaanlei 5pm in zingka 7am tiang hohmanh kohti kun ah kal hlah uh, a ti.

“Matupi in Pha Neng khua ah hohmanh kal hlah uh, chun ah Pha Neng khua lei nan kal tik zongah Kah-Lah-Yah 140 Battalion ralkap sakhan nan tan tikah hmanthlak, phone chawn, motorcycle dirter hlah uh, hohmanh ramtang ah meithal he vak hlah uh.”

“Chun ah kohti kun nan kal tikah ralkap lei hmanthla hlah uh, tbk.,” pawl in thawng an thanh.

Matupi khua chung Mindat lampial, Sa Bong lamton ah February 6 zaan thokin ralkap nih an hngah cang.

February 3 ah Kawlrawn lei in ralkap mawttaw 50 lengin ralkap tampi Matupi ah an rak phan.

A thaizing ah helicopter 4 in ni fatin Matupi ah ralkap an rak phanh lengmang fawn caah khuami an lungrethei tuk. — CHRO

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.