Mexican pipeline explosion kills at least 20

Tuni ah Mexico ram i zinan pipe a puah caah a tlawmbik minung 20 paoh an thi i adang 54 hliam an tong, tiah cozah nih thawng a thanh – hnu ah a thi chapmi le hliam a tong chapmi zong an um rihte kho men.

Zinan fir aa timmi pawl nih pipe an vihnak ah a puakmi si lai, tiah zumh a si.

Zinan pipe a puahnak hmun cu Tlahuelilpan khua ah a si. Mei a alh thluahmah, minung tampi cu ‘kan bawm uh..’ tiin an au i an ttap.

“Atutiang thil sining kan theih khawh tawk ahcun, a tlawmbik minung 20 paoh cu meikangh in an nunnak a liam cang,” tiah Hidalgo state cozah hruaitu Omar Fayad nih Mexican TV sinah a chim.

Mexico ram ahhin zinaan fir a tam ngai.

“2018 chungah zinaan fir ruangah kan sunghmi tangka hi $3 billion a si,” tiah Mexico President Andres Manuel Lopez Obrador nih a chim.

Zinan fir pawl cu Mexico cozah nih biatak in a kawl i a tlaih lengmang hna nain an dih kho lo.

“Kan rammi ahohmanh zinaan firtu lakah i tel hlah uh tiah kan nawl hna. Phungninglo a si pinah, nanmah he nan chungkhar he thih ri nun ri ah nan i chiah a si,” tiah state cozah hruaitu Fayad nih a chim.

Zinan pipe a puah/kehnak zawn cu cozah zinan company Petoles Mexicanos sehzung pawngah a si.

President Lopez Obrador nih, “ka lungrethei tuk hringhran. Cozah thazaang dihlak in hliam a tongmi le pawngkam minung kan chanh hna lai,” tiah Twitter ah a ttial. — Reuters

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. The Chin Express dirh a duh caah 2017 ah RSC ah rian dinhnak ca a ap i ni fatin Chin thawngpang le vawlei cung thawngpang phunkip a ṭial.