India ram nichuahchaklei, Mizoram state ah kum 10 dengmang an tuah ti lomi Chin Miphun Ni cu tu kum ah sunglawi takin tuah an tim tthan tiah kan theih.

February 20 ah tuah dingmi Avoi 71nk Chin Miphun Ni cu Mizoram state khualipi Aizawl ah Chin Pawlpi hruainak in an tuah lai.

Khuallian ah Mizoram state Vuanci choh Pu Zo Ram Thanga, Sagaing Ramtthen Chin Affair Minister hlun Pu No Than Kap le Chin state Sipin Vuanci hlun Salai Isaac Khen hna sawm an si tiah Chin Pawlpi secretary S.Huliana nih a chim.

“Atu bantuk in Chin Miphun Ni kan tuah tthannak a ruang cu Mizoram state ah Chin miphun tampi kan um. Pathian nih thluachuah a kan pekmi Miphun Ni tuah khawh lo cu ngaihchia ngai a si. Curuangah, tu kum thok cun kum fatin Chin Miphun Ni tuah kan i tim,” tiah S.Huliana nih a chim.

February 19 ahkhin Chin Miphun Ni donnak caah zaanglek (sport) an tuah lai. February 20 zaan ah Vanapa hall ah Chin Miphun Ni cu sunglawi takin an tuah lai.

Mizoram state ahhin Chin Miphun Ni hi 2009 hnu lei cun a tlangtlatu bu an um ti lo ruangah an tuah kho ti lo. Atu kum 10 dengmang hnu ah an tuah tthan lai.

Aizawl ah tuah dingmi Chin Miphun Ni ah Kalay University in Falam phunsang tlawng Cultural Dance Group minung 20 leng an rat lai pinah Myanmar ram in hlasak thiam JH Thang le Mai Ma Kim zong an i tel lai.

Cun, Mizoram hlasa minthang simi G.Lalsangliana, Baby Z.Tlau, Angaihtei le Ma Biaki zong sawm an si.

Cupinah, Central Young Mizo Association (CYMA) chairman Pu Vanlalruata le Shilong khua in Pu Tialkulhthanga zong an sawm hna.

Chin Miphun Ni February 20 cu Mizoram state i State Day a si. _ Khonumthung Burmese

Azi cu Faiceu Journal website ah kum 1 leng thawnggpang a leh hnu ah The Chin Express (theihtlei.com, thechinexpress.com le thechinexpress.info) ah kum 3 chung thawngpang 2,000 leng a let/ṭial cang.