New Zealand Chin ngakchia pawl vawlei cungah a ttha bikmi Saxton sports thilri an hmang kho

New Zealand ram, Nelson khuapi ah a ummi Chin ralzaam le New Zealand siangngakchia pawl nih vawlei cungah a ttha bik si vemi le hlan man a fak taktakmi Saxton Celhtual le a thilri hman a nuamhnak cu avoi 1nk bik an teh khawh ve cang.

Nelson Sianglairuun Sianginn ah Chin ralzaam ngakchia tampi an kai ve. New Zealand ram ahhin Chinmi 2,000 hrawng kan um i tampi cu Nelson khuapi ah kan um hna.

Chin ralzaam ngakchia le an kai tti sianngakchia 80 hrawng cu Ningani ahkhan vawlei cung level in tuahmi Saxton Celhtual ah an kalpi hna i setbing citnak hmun thar ah avoi 1nk bik setbing an i cit, hramh phahmi celhtual ah hockey le cricket celh an cawng.

New Zealand, ahlei in Nelson sianginn ahcun ngakchia hna lente celhpi hi biapi tukin an chiah. Setbing cit, hockey le cricket celh hna cu Laitlang ah kan i celh bal lo caah maw si hnga, sunhsak awk ah kan ruat leemlo nain hika cun an sunhsak ngai.

Sianginn lutlai changtu Simon Patel nih, “voi dang ahcun nulepa bawmhnak thawngin siangngakchia tlawm tete in hika Saxton hockey celhtual tiang hi kan rak ratpi tawn hna,” a ti.

“Nain, a man fah tuk caah bawmtu an um lo ahcun siangngakchia tampi kan ratpi kho bal hna lo,” a ti.

“Saxton Celhtual a ngeitu company Sport Tasman nih kan sianginn zarh 10 chung caan hmannak ding a kan bawmh lai, hramh hlan man le umkalnak ca tiang a kan bawmh lai. Setbing zong a kan hlanh dih lai.”

“Chin ngakchia hna cu hika te hin volleyball le bawlung chuih in an caan a dih tawn.”

“Chin ngakchia pawl hi mah bantuk caan ah an i tel ve lo ahcun, zei tik hmanh ah Saxton Celhtual kha an phan kho bal lai lo.”

“Saxton Celhtual i an setbing citnak hmun kha khuaruahhar si, tutan siangngakchia vialte lakah ahohmanh nih mah bantuk hmun ahkhan setbing an rak i cit kho bal lai lo.”

“Ka hin cun concrete cungte ah lente kan i celh, Saxton Celhtual ahcun hramh cungah kan i celh, aa dang tuk,” a ti.

Sianginn cachim Ben Johnson, Tom Inham le Patel hna nih siangngakchia pawl cu Ningani chuncaw ei khawh in Saxton Celhtual ahcun an va zulh hna.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.