Ni Len Par Mawi Hi Hlawhtlinnak A Hmuh Hlan Ah Zeitluk In Dah A Rak I Zuam

Chinmi awttha chungin Myanmar ram ah min ngei a si vemi Nu Ni Len Par Mawi hi hlasa pakhat sinak in hlawhtlinnak a hmuh hlan ah zeitluk in dah a rak i zuam ti hi na hngal cang maw?

Ni Len Par Mawi cu a ngakchiat lio tein hlasak a huam ngaimi a si. Amah nih cun tang 10 kai dih in University kai pah, hlasak pah aa tim nain a chungkhar nih an duh lo.

A chungkhar nih cun a tang 10 awnnak mark nih a phakmi Engineer kai seh ti an duh. Cu hnu lawngah, na duhmi paoh na tuah lai an ti.

Ni Len Par Mawi cu a nulepa bia a el ngam hna lo caah
WYTU (West Yangon Technology University) ah a kai. Nain, a thli tein hlasak zuamnak ah aa zuam.

Music Festival, Galaxy Star le Myanmar Idol Season 2 hna ah hlasak a rak i zuam. Galaxy Star ahcun top 26 tiang a phan. Myanmar Idol Season 2 ahcun audition a awng lo.

University kum 3 nak a kai ah ttamh (make-up) a huam. Cutikah, Ni Len nih si a duhmi le tuah a duhmi cu a chungkhar a chimh hna. Nain, a chungkhar nih cun University na dih lo ahcun an ti i an sianh lo.

Ni Len Par Mawi le Myanmar Vice President Pu Van Thio Nupi

Cutin, Ni Len Par Mawi cu Bachelor of Engineering (BE) Degree a hung la. Mah ahhin, Ni Len cu hlasak lei ah a lungdong cang. Cucaah, makeup a cawng.

Make up a cawnnak ‘Hello’ class in MRTV-4 tuahmi The X Factor Myanmar hlasak zuamnak ah mi a va ttamh hna.

The X Factor ah aa zuammi hlasak pawl cu Ni Len nih a hmuh hna tikah a uar tuk hna. Anmah bantuk si a duh tuk ve.

Caan tlawmpal ah, Myanmar Idol Season 3 an tuah lai timi thawngpang a theih. A hawikawm le dawtu nih i zuam ve ding in an forh.

Ni Len Par Mawi nih Myanmar Idol Season 3 ah hlasak kaa zuam lai i ka hlawhtlin lo ahcun hlasak cu ka ngol cang lai a ti. Myanmar Idol Season 3 i auditon a awn cu a chungkhar nih an thei rih lo. A thli tein aa zuammi a si.

Top 11 a phak ah a tlangval nih a thih tak. Hi lio ahhin Ni Len Par Mawi cu a lungrawk tuk hlasak zuam peh ding cu a caah a rak har ngai.

Nain, lungtthawn aa pe i hlasak cu aa zuam rih ko. A lungttawnnak nih mithinglung a lak i thapetu zong an tam chin.

Mah lio ahcun thil sining a thei lomi nih Ni Len Par Mawi cu comment ah an soisel. Messager in nangmah cu zeitik hmanh ah a hlawhtling lo dingmi na si ti te hna in an kuat. Nain, mi cheukhat nih cun hlasa pakhat ah an cohlan i thazaang an pek. 

Ni Len  Par Mawi cu hlasak aa zuam lio i ka dawtmi a sunghmi ngaihchiatnak nih a hlawhtlingmi hlasa pakhat si dingin zuam duhnak a ngeihter.

Cun, atu ahcun a chungkhar le thapetu mipi nih a hnulei in an dirphi cang caah zeibantuk soiselnak hmanh a tei khawh dih.

Azi cu Faiceu Journal website ah kum 1 leng thawnggpang a leh hnu ah The Chin Express (theihtlei.com, thechinexpress.com le thechinexpress.info) ah kum 3 chung thawngpang 2,000 leng a let/ṭial cang.