North Korea nih nuclear hriamnam hlawt ai tim lo
  • China le Russia hi computer lei ah ttihnung tuk an si
  • Iran nih nuclear hriamnam a ser lo, nain hmailei ah US caah ttihnung a si kho
  • US nih ISIS a hrawk dih taktak rih lo

President Donald Trump acozah nih cun ‘North Korea nih nuclear hriamnam a hlawt te ko lai’ ti aa ruahchan i a ra laimi caan zongah North Korea President Kim Jongun ton an timh.

Nain, US sungtthoh bu pawl nih Hlutdaw Sang (Senate) ah report ca an apmi ah “North Korea nih nuclear hriamnam hlawt ai tim leemlo…” ti a si.

North Korea cozah nih nuclear hriamnam hi kan nunnak a si ti bantukin an ruah i hlawt an i tim lo, tiah US intelligence nih an ti.

President Trump le Kim Jongun cu liamcia June thla ahkhan Singapore ram ah an rak i tong. North Korea nih nuclear hriamnam hlawt in US nih chawleh a khammi hunpiak ve dingin hnatlaknak an rak ngei nain atutiang ah North Korea nih nuclear hriamnam ser a ngol rih hlei lo.

Cun, China le Russia hi computer hack lei ah an tthangcho tuk. An ttangtti tuk fawn i a ra laimi 2020 US Thimnak hi China le Russia nih an hack te khawh men, tiah US intelligence nih an ti.

1950 thokin atutiangah hi tlukin Russia le China an rak ttangtti bal lo. Atu cu an ttantti dan a ttha tuk.

CIA director Gina Haspel nih, “Iran cu nuclear hriamnam a ser lo, nain a ralkap thazaang tthawnter aa zuam thluahmah caah hmailei ni khatkhat ahcun US caah ttihnung a si te kho men ko,” a ti.

Trump acozah nih ISIS kan hrawh cang a timi kha a dik lo, Middle East hmun cheukhat ah ISIS an um peng rih ko. An thi rih lo, ti zong an report chungah aa tel. BBC English

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.