December 31 ahkhan Chin State, Hakha khuapi ah Sagaing ramtthen biaceih bawi U Win Myint i fapa Sai Wanah Aung (kum 32) monghmi motor le Nu Ni Iang (kum 23) citmi motorcycle an i pah i Nu Ni Iang cu January 3, 2019 zaan ah a nunnak liam.

“Atu a cangmi accident ruangah Ni Iang a thi. Motor mongtu pa hi Upadi ning in tazacuai a si lai. Tazacuai lo hrim a ngah lo. Thil a can ni hi zungkhar ni a si tikah kei zong bia fiang tein ka thei rih lo.”

“Mi cheukhat nih Sai Wanah Aung hi keimah nih kum thar hmang dingin a sawm an ti, keimah nih ka sawmmi a si lo. Ka theihmi zong a si lo. A dang nawl ngeitu pakhat nih a sawmmi a si,” tiah Chin State Chief Judge U Win Myint Kyaw nih a chim.T

2018 December 31 zaan ah Sai Wanah nih zuu rit bu in motor a mongh i khatlei lam in a rami Nu Ni Iang le hawile 2 citmi motorcycle cu hmaitonh in a va pah.

Ni Iang cu a lu kuai, a hmai kok dih, a orhlei ngal ruh kiak, A kehlei ban ruh a kiak i faktuk in aa khawn caah Mandalay sizung ah an kalpi.

Nain, a thluak chung ah thi a luh caah sibawi te nih chanh kho lo in January 3 zaan ah a nunnak liam. A hawile Sui Hlawn Par (kum 21) le Mai Run Tha Cer (15) zong an i khawng i Hakha sizung an phan ve.

“Tuan ahcun Faktuk In Khawn Upadi Dal 337/338 in case kan tuah. Nain, atu ah Ni Iang a thih cang tikah Dal 304(a) ah kan tthial. Hi Dal 304(a) ah hin cun Sai Wanah hi tlaih hrimhrim a hau. Atu tiang ahcun biafiang chim awk a um rih lo,” tiah Hakha palek bawi chang U Thein Tan Oo nih a chim.

Accident a can lio ahhin Sai Wanah cu zuu a ri i,keimah ka palh lo anmah an palh tiin aa hrocar chih. Nu Ni Iang cu a thi cang nain atu tiangah motor pahtu Sai Wanah cu an tlai kho rih lo.

A thimi Nu Ni Iang hi Hakha peng Farrawn khuami a si. Kalay Univeristy ah Chemistry major in degree a la i Hakha Economic Bank ah rian a ttuanmi a si.

Azi cu Faiceu Journal website ah kum 1 leng thawnggpang a leh hnu ah The Chin Express (theihtlei.com, thechinexpress.com le thechinexpress.info) ah kum 3 chung thawngpang 2,000 leng a let/ṭial cang.