Aho paoh kan nu paw chungin kan chuah le cangka in vawlei cungah kan ngeihmi cu kan nulepa lawng hi an si. Kan nulepa lo in cun nihin kan dirhmun cio hi kan phan kho lai lo.

Fale nih kan nulepa cu mi zohkhenhtu le mi cawnpiaktu ah kan ruah hna. Nulepa nih fale lamding an zulh khawhnak hnga a kan cawnpiak ko nain minung kan si ve bang fale nih palhnak cu kan tuah ttheu tawn.

Fale nih hin nulepa hi a kan sertu, a kan zohkhenhtu le a kan kilvengtu ah kan ruah hna. Cucaah, nulepa cu ngakchia hmuhnak ah zeipaoh a tuah khomi an si.

Nulepa nih fale cu thinhung in nan sik lengmang hna ahcun an upat tikah an i tthan pi lai i an fale kha nan rak tuahto hna bantuk khan an tuahto ve hna lai.

Nulepa nih fale sinah chim bak lo dingmi bia pawl:

Nangmah caah zeipaoh kan tuahpiak: Na hrinmi na fa a si bang na fa caah zeipaoh na tuahpiak awk a si. Fale nih hrin hi an i thimmi si lo. Nangmah caah zeipaoh kan tuahpiak tiin fale sinah biachim hi ningzah awk ngai a si. An herhmi tuahpiak a hauh paoh ah anmah hi mawhchiat hna awk an si lo.

Ngam cang, Ttap ti hlah: Na fa cu a ruang um loin a ttah zongah ngam cang, ttap ti hlah na ti lai lo. Ngakchia nih cun an thinlung an i tthing kho lo. Ttap ti hlah nan ti hna ahcun lungduhnak (emotion) ngeih hi a ttha lo hi ta tiin an ruah lai. An diriam tiang ttahter hna ding an si ko. A donghnak ahcun anmah tein an ngam tthan ko lai. An ttah lio ah bia dangdang tu ruah an ttha.

Ka lung na rawk tuk: Fale nih thil sual pakhat khat an tuah tikah nulepa nih ka lung na rawk tuk tiin an ti ttheu tawn hna. Na fa nih thil sual a tuah tikah ka lung na rawk tuk ti loin lam ding a zulh khawh nakhnga le tu hnu ah thil sual a tuah ti nakhnga lo bawm.

Na hawi na tluk lo: Fale cu midang fale he tahchunh ding an si lo. Ngakchia cio cio ah a fim deuhmi le a thiam deuhmi an um. Cutik ah, nulepa  nih cun fale i an huammi thiltuah le cawn tu kha thazang nan pek awk a si ko.

Cu lo i na hawi dang cu cuntin a um, khatin tiah na ti hnawh langmang a si ahcun hmailei ah mi a chuah kho lai lo. A lung dong lai.

Bia kan kamh: Nulepa hna nih fale cu fawi tein bia kamh hna ding an si lo. Biakam ningin a tlamtlin ahcun fale nih nulepa cungah zumhnak sangpi an ngei.

Nain biakamhmi a tlin lo tikah fale nih nulepa cungah an ngeihmi zumhnak cu a zawr hniahmah ko. Cutik ah, nulepa nih na tlamtlin lonak kha tha tein na chimh lai i na biakammi cu a tlinnak dingah na zuam ko mi zongkha na chimh chih lai i na fa cu a lawm tthan ko lai.

Azi cu Faiceu Journal website ah kum 1 leng thawnggpang a leh hnu ah The Chin Express (theihtlei.com, thechinexpress.com le thechinexpress.info) ah kum 3 chung thawngpang 2,000 leng a let/ṭial cang.