'Kawl Ralkap le AA chiatnak chim hlah uh' tiin Paletwa ralzaam an ti hna

Paletwa peng ralzaam pawl cu, “Kawl Ralkap le AA nih harnak an in pekmi hna hi chim hlah tiin uknak lei upa pawl nih an ti hna” tiah theih a si.

Mah kong he pehtlai in, ralzaam a simi kum 55 pakhat nih hitin a chim.

“Ralkap lei le uknak lei upa pawl nih bia a kan cah. Kan umnak hmun ah ral a thawh caah Kawl Ralkap nih a kan ven. Cucaah an tthat lonak chim hrimhrim hlah uh, tiah uknak lei upa pawl nih bia a kan cah.”

“AA zong nih, khua i kan rak um lio ah hall ah a kan auh. Ralkap pawl zul in lam chim hna hlah uh, harnak nan tong kho. Kawl Ralkap pawl cu tilawng zong in thlah hna hlah uh. Tilawng mawng le hmailei minung 2 kan in kah sual hna lai tiin AA ralkap pawl nih a rak kan ti,” tiah a chim.

Paletwa pengah, Kawl Ralkap le AA nih inn zuat satthil pawl cu a man cheu lawng a kan pek i an i lak lengmang, AA nih khuami an tlaih hna i phone an chuh hna, tiah khuami sin in kan theih.

Ralzaam pawl kap 2 ralkap nih harnak an pekmi hna kong chim lo dingin bian nan cah tak hna maw? tiah Miza penguk bawi U Hoih Law kan hal i “kanmah uknak lei upa pawl nih cun mah bantukin bia kan cah hna lo” a ti. — Zalen

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. The Chin Express dirh a duh caah 2017 ah RSC ah rian dinhnak ca a ap i ni fatin Chin thawngpang le vawlei cung thawngpang phunkip a ṭial.