President Trump ‘Hlutdaw biachimnak’ ah Chinpa Awn Sian Mung an sawm ve

February 5 zaan 9pm ah US President Donald Trump cu Washington DC um Hlutdaw (Congress) ah US rampi le upadi kong biachimnak a ngei.

President biachimmi cu ra ngai ve dingin US Hlutdaw Niam (House) lutlai changtu Ben Ray Lujan nih Awn Sian Mung a sawm i New Mexico state in Washintong D.C. ah a zuang ve.

Awn Sian Mung @Mungsan hi liamcia kum 7 ahkhan Malaysia in US ram ah ralzaam in a rak phanmi a si. Colorado state ah a rak phan nain atu cu New Mexico state ah aa thial cang.

Mungsan cu Albuquerque khuapi ah a ummi ralzaam bawmtu zung “Lutheran Family Services Rocky Mountains” ah hruaitu Lead Case Manager a ttuan lio a si.

“Tu kum President Hlutdaw biachimnak ah Mungsan nih aa ka zulh caah kaa lawm tuk. Mungsan cu hika ram ah ralzaam in a rak phanmi a si, atu cu New Mexico ah nun ttha deuh a kawlmi pawl bawmtu a si cang. Kan minung sinak hi mi kan hrawmh cio hna ahcun America ram ah zeidah a si kho ti cu, zohchun awktlak a simi Mungsan tuanbia nih a kan hmuhter,” tiah House Assistant Speaker Ben Ray Lujan nih a chim.

An sawmnak kong he pehtlai in Mungsan nih hitin a chim.

“Ralzaam bawmtu zung ah ka ttuan ruangah an ka sawmmi a si. Ka ttuannak zung ahhin keimah lawng Myanmar rammi ka si. Ralzaam pawl US an phanh hlan in, an phanh tikah an khuasak tintuknak vialte khua kan khanpiak hna,” tiah Mungsan nih a chim.

“An ka sawm caah kaa lawm tuk. President biachimnak ‘State of The Union’ ahhin cun biachimnak an ka pe lo, nain tuni le thaizing hi Hlutdaw chungtel (Congressmen) pawl sinah biachim dingin caan an ka suaipiak len.”

“President Trump nih mipeem le ralzaam thlanglamhnak bia a chim lengmangmi hi a herh lo tiah ka ruah. A ngaingai chim ahcun, a nupi zong cu mipeem a si ko.”

“Voi dang ahcun US nih kum fatin ralzaam 90,000 hrawng a lak peng hna nain President Trump nih 30,000 ah a tthumh ruangah, ralzaam tampi harnak an tong lai, kum sau deuhpi ram hnihnak ah har ngai in an taang lai.”

“Hlan ahcun mi nih bawmhmi ka rak si ve nain, atu ahcun mi a bawmtu rian ka ttuan ve cang caah kaa lungsak tuk,” tiah Mungsan nih a chimchap.

Mungsan cu liamcia November thla i US Hlutdaw Palai Thimnak (Midterm Election) zong ahkhan Democratic palai pawl a rak vote hna.

President Donald Trump a nupi Melania Trump cu Slovenia ram a rak chuak i a nungak hnu ah US ah a peem i Donald Trump he aa ummi a si.

President Barack Obama nih Hlutdaw ah bia a rak chim lio zongah, US ramah Hisho Sushi company ngeitu Myanmar rammi U Philip Maung an rak sawm bal. Rakhine state in US a phanmi nu Nwe Oo zong an rak sawm bal. — Voice of America le Ben Ray Lujan

President Trump nih Hlutdaw ah bia a chim lio

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2017 ah The Chin Express a dirh i ni fatin Chin thawngpang le vawlei cung thawngpang phunkip a ṭial.