President Trump le Kim cu February 27-28 Vietnam ah an i tong lai

Washington – US President Donald Trump nih “US cozah palai pawl nih North Korea cozah an va ton hna i an hlawhtling ngai, North Korea President Kim Jongun he Vietnam khualipi Hanoi ah kan i tong lai,” a ti.

“Keimah aiawh in North Korea cozah a va tongtu pawl cu hlawhtling ngai in North Korea in an chuak cang. Kim Jongun he avoi 2nk i ton ni le caan zong lungtlinnak an ngei cang. February 27 le 28 khi Vietnam khualipi Hanoi ah kan i tong lai,” tiah Trump nih Twitter ah a ttial.

“Chairman Kim he i ton in daihnak lohma pehzulh lai cu kaa ngaih hringhran!” a ti.

Tu zarh thokka ahkhan Trump nih ton nithla le Vietnam ah kan i tong lai ti cu a rak thanh cang nain, Vietnam ram khuazei khua dah kan i ton lai ti cu a rak chim lo.

Trump le Kim an i tonnak kong cu US North Korea palai Stephen Biegun nih North Korea khualipi Pyongyang ah ni 3 chung North Korea cozah a va ceihpi hna.

June thla ahkhan Singapore ram ah avoi 1nk an rak i tong, North Korea nih US a tlerhnak nuclear hriamnak hlawt in US nih chawlehnak a phihmi hunpiak ve dingin hnatlaknak an rak ngei nain atutiang North Korea nih a nuclear hriamnam a hlaw taktak rih lo. — Reuters

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.