President Trump le Kim Jongun tonnak cu pakpalawng in a dih

US President Donald Trump nih North Korea hruaitu Kim Jongun he hnatlaknak pakhat hmanh a ser kho lo. A tanttim in an ngol.

An ngol hnu ah media sin thawngthanhnak an tuah.

President Trump nih, “ni kum June thla i Singapore ah kan i ton hnu in thil sining a ttha deuh ngai ko nain, tuni ah North Korea nih ‘chawlehnak na kan phihpiakmi vialte a dihlak in hung cang’ a kan ti caah kan lungtling lo,” tiah a chim.

“North Korea nih chawlehnak na kan phihmi vialte a dihlak in hung dih uh a kan ti caah kan cohlang kho lo.

“Kim Jongun hi tinhmi dangte a ngei, kanmah kan i tinhmi he aa dang tuk. Liamcia kum lio nak cun thil sining a ttha deuh tuk ko, i ni khatkhat ahcun thatnak tling kan phan te lai ti ka zumh, nain tutan cu ngol ko usih tiin bia kan khiah,” tiah Trump nih a chim.

Biaruahnak an thok hlan ah White House nih, “tutan cu lungtlinmi an ngei lai i minsen thutnak le chuncaw i hrawmnak puai zong a umte lai,” tiah thawngla pawl sinah an rak chim.

Nain, US nih chawleh phihpiakmi vialte hunpiak dih dingin an chim cangka in thil a rawh dih caah zeihmanh lungtlinmi zong an ngei kho lo i minsen thutnak le chuncaw i hrawmnak puai zong an leet dih caah White House caah cun lungrawk taktak a si.

George W Bush nih US President a rak ttuan lio ah Asia kong ruahnak petu a simi Dennis Wilder nih, “President tonbiaruahnak ah atu bantuk a tanttim in ngol hi a um bal lo, Trump lawng a hmang,” tiah a chim.

“North Korea lei nih Yongbyon ah a ummi nuclear sernak sehzung cu kan hrawh dih cikcek ko lai, i US nih chawlehnak na kan phihpiakmi vialte hung dih ve uh a kan ti,” tiah Trump nih a chim.

“Nain, hmun dangah a ummi nuclear sehzung pawl cu Pu Kim nih hrawh a siang lo. Yongbyon nuclear sehzung hrawh cu thil lianngan tuk a si ko nain, chawleh phihmi vialte a dihlak in hunpiak ding ahcun nuclear sehzung dihlak an hrawh dih a herh,” tiah a chim.

“North Korea nih zapi theih in a phuan bal lomi nuclear sehzung pawl an umnak zong US nih kan hngalh. Kan hngalhmi cu North Korea nih an theih tikah an lau ko,” tiah a chimchap. — BBC English le Financial Times

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2017 ah The Chin Express a dirh i ni fatin Chin thawngpang le vawlei cung thawngpang phunkip a ṭial.