Pu Biak Hmun, Malaysia Chin Miss Rosy a pa nih mual a kan liamtak
Rosy nu, Pu Biak Hmun (Rosy pa) le Rosy

Malaysia – Pu Biak Hmun, kum 43 nih tu zingka suimilaam 8:30am ah ruah lo piin mual a kan liamtak.

“Pu Biak Hmun hi nizaan zong a hawile he an leng ko, a dam ko. Nain, ruah lo piin tu zingka 6am hrawngah a tho i ‘ka paw fak’ tiin zunput a kal. 7am hrawngah a tho tthan i pawfah sii a din tawnmi ‘antacid’ a din i voi 2 aa luak,” tiah chungkhat sin in kan theih.

Aa luak khawh in ihnak khaan ah a lut. ‘Ka taksa a fak pah, ka hmet ta uh’ a ti i a nupi le fale nih an hmeh lio ah a thaw dih thluahmah. Cutin a hmurka an tong kho ti lo.

Ambulance in sizung ah rianrang in an tlikpi nain chanh khawh loin 8:30am hrawngah a nunnak liam.

Liamcia caan ah pawfah a rak ngei pah tawn nain nai hrawng cu a dam ngai cang tiin ruah lio ah ruah lo piin mual a liam hi si.

Sizung nih cun a thihnak aruang an ttial rih lo nain ‘hlan lio i pawfah a rak ngeihmi ruangah si men lai’ tiah chungkhat nih an zumh.

Pu Biak Hmun cu Thantlang peng, Congthia khuami a si. A nupi Pi Thla Tang le an fale 4 a rohtak hna.

A fale 4 lakah upabik cu Rosy Ngun Tha Bor, 2018 Chin Miphun Ni miss zuamnak ah pakhatnak a ngahtu kha si.

Zei tik dah a ruak lak khawh a si lai ti cu a fiang rih lo. Laitlang ah tlunpi ding maw a si lai asiloah Malaysia ah dah an vui lai ti zong a fiang rih lo. Hnu ah kan update tthan te lai.

Tantakmi chungkhar Bawipa nih umpi ko hna seh, thlacam piak cio hna usih.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.